DILI, 16 outubru 2020 (TATOLI)–Timor-Leste, ohin, selebra Loron Ai-han Mundiál iha Sentru Konvensaun Dili ho tema “Kuda, Hakiak no Haburas Ai-han Nutritivu hodi Sustenta Jerasaun Futuru ne’ebé Saudável no Ita-nia Asaun mak Ita-nia Futuru”.
Reprezentante World Food Programme (WFP) iha Timor-Leste, Dageng Liu, hateten objetivu hosi loron ai-han mundiál ne’e promove konsiénsia no asaun ema hotu nian kona-ba hamlaha no nesesidade hodi hatán ai-han saudável ba ema hotu-hotu.
“Ohin, ita selebra ema hirak ne’ebé mak prodús, kuda, koilleta, kaer ikan no transporte ita-nia ai-han no ha’u bolu ita hotu iha ne’e atu hato’o ita-nia agradesimentu ba erói ai-han ne’ebé mak kontinua fornese aihan ba sira-nia komunidade no ema seluk. Loron ai-han mundiál ne’e promove konsiénsia no asaun ema hotu nian kona-ba hamlaha no nesesidade hodi hatán ai-han saudável,” dehan Dageng Liu iha ámbitu selebrasaun Loron Ai-han Mundiál iha Centro Convenção Dili (CCD), Dili, sesta ne’e.
Reprezentante Programa Aihan Mundiál (WFP) iha Timor-Leste, Dageng Liu hatete, loron ai-han mundiál ajuda ema hodi bele hanoin fali nesesidade báziku hanesan ai-han ne’ebé barak tebes iha mundu ne’e, tanbasá mak kuaze ema rihun 700 ne’e barak liu feto no labarik sira mak kalan-kalan toba ho kabun hamlaha.
Nia dehan, konflitu no mudansa klimátiku estremu mak kauza prinsipál hosi hamlaha ne’ebé mak aumenta ba bei-beik. Pandemia COVID-19 aumenta tan ema rihun ba rihun besik tama ba iha faze hamlaha.
“Eventu ohin nian hatudu ba ita katak importante tebes ajuda ita-nia populasaun espesialmente sira-ne’ebé mak vulneravel tebes no asegura ita-nia sistema ai-han tenke reziliente no makaas hodi bele luta hasoru mudansa klimátika,” nia dehan.
Nia hateten, ambisaun Timor-Leste nian mak bele atinji zero fome ka zero hamlaha iha tinan 2030 maibé hatene katak 36% hosi populasaun sofre inseguransa ai-han moderadu no maka’as.
“Pandemia COVID-19 hafanun ita nu’udar nasaun ne’ebé mak depende maka’as tebes ba importasaun. Tempu ona, ba ita atu bele haree fila-fali problema estruturál kona-ba oinsá sistema ai-han iha ita-nian ne’e funsiona,” nia dehan.
Bazea ba estudu prenxe lakuna nutriente ne’ebé hala’o iha 2019 husi ONU servisu hamutuk ho Konsellu Nasionál ba Seguransa Ai-han, Soberania no Nutrisaun iha Timor-Leste (KONSSANTIL), kuaze uma-kain iha Timor-Leste la konsege prenxe sira-nia nesesidade han ai-han enerjia ho kustu entre $30 to’o $60 kada fulan.
Maibé se sira hakarak han ai-han ho nutrisaun sira presiza tan kustu entre $158 to’o $211 kada fulan, kustu ne’ebé boot liu saláriu mínimu $115 kada fulan tanba ne’e maiória uma-kain labele sosa ai-han ho nutrisaun.
“Tanba ne’e, ita presiza aumenta han ai-han ho proteina ne’ebé kualidade no rezolve problema hamlaha haksumik, hanesan falta vitamina no mineral sira iha ita-nia dieta,” nia hateten.
Jornalista: Osória Marques
Editór: Cancio Ximenes
