Komandante PNTL Munisípiu Lautem, Superintendente António Rego Fernandes. Imajen Tatoli/Eugénio Pereira

LAUTÉM, 16 outubru 2020 (TATOLI)–Durante fulan tolu, hosi jullu to’o setembru 2020, Komandu Polísia Munisípiu Lautém, Seksaun Investigasaun Kriminál, rejista kazu krime simples hamutuk 50 maka akontese iha área jurizdisaun Lautém nian.

Komandante PNTL Munisípiu Lautém, Superintendente António Rego Fernandes, hateten, hosi kazu 50 ne’e, domina hosi kazu ofensa integridade simples.

“Kazu krime ita rejista kazu 50, ne’ebé maioria kazu ofensa integridade simples,” Superintendente, António informa ba jornalista, ohin, iha nia knaar fatin iha Lautém.

António dehan, tuir dadus estatístika, tinan ne’e, kazu krime ladún akontese kompara ho tinan 2019 nian.

“Ita rejista kazu krime menus liu, tanba polísia liuhosi Ofisiál Polísia Suku (OPS) ho Autoridade Konsellu Polisiamentu Komunitáriu (KPK) kontinua halo vizita tama-sai povu nia uma konvense ho juventude oinsá kontribui ba pás iha idak-idak nia fatin,” nia hateten.

Iha parte seluk, Komandu PNTL Lautém mós kontinua asegura órden Estadu hosi kontrola movimentu transporte no abitante sira durante períodu implementasaun Estadu Emerjénsia (EE).

PNTL Lautém kada semana sempre halo operasaun pasa revista ba transporte sira inklui halo apreensaun ba transporte públiku sira ne’ebé kontra lei tránzitu nian hodi submete ba detensaun  no selu koima infrasaun.

Estrutura KPK kompleta ona suku hitu

Iha parte seluk, Komandu PNTL Lautém, daudaun ne’e, kompleta ona estrutura membru Konsellu Polisiamentu Komunitáriu (KPK) iha suku hitu maka simu ona pose.

“Agora iha suku hitu maka ita estabelese ona membru KPK no suku sira seluk ita sei iha faze preparasaun to’o suku 10, no ba suku sira seluk ita sei fó pose iha tinan oin mai,” nia hateten.

Durante ne’e, Komandu Lautém mós enfrenta difikuldade menus transporte operasaun, tanba karreta 13 ne’ebé PNTL iha, karreta operasaun lima (5) mak halo hela operasaun iha kondisaun ladún di’ak no presiza halo manutensaun kada fulan.

“Ita iha karreta 13, maibé karreta lima halo operasaun ho kondisaun ladún di’ak,” nia tenik.

Mezmu hasoru difikuldade, maibé PNTL Lautém  ho membru efetivu 156 kompostu hosi feto na’in-27 no mane na’in-129 kontinua halo nafatin sira-nia responsabilidade hodi asegura estabilidade iha Lautém ho Postu Administrativu lima,  Iliomar, Lautém, Lospalos, Luro no Tutula, ne’ebé kobre ho suku  34.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here