Diretór Ezekutivu Centro Nacional Chega, Hugo Maria Fernandes. Imajen Tatoli/Joanico de Araújo

BOBONARO, 16 outubru 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes, hateten sentru ne’e presiza lei arkivu nasionál tanba importante atu asegura dokumentu.

“Ami hala’o knaar durante tinan-tolu maibé laiha lei kona-ba arkivu atu suporta. Ami-nia knaar maka oinsá buka arkiva dokumentu,” Diretór Ezekutivu ne’e hateten iha debate públiku ho tópiku ‘pápel mídia iha prosesu konstrusaun Estadu’ iha ámbitu komemorasaun tinan 45 trajédia Balibo Five, ne’ebé hala’o iha postu administrativu Balibo, munisípiu Bobonaro, sesta ne’e.

Nia nota katak Timór nia arkivu dokumentu kuaze espalla iha mundu tomak, tanba ne’e presiza asegura.

“Tinan rua liubá ami partisipa konferénsia iha Amerika no ha’u foin hatene, ativista banku mundiál hateten katak dokumentu korrespondénsia ne’ebé maka intensivu liu iha 1975, antes Indonézia halo invazaun mai Timór ne’e entre Prezidente Banku Mundiál no Prezidente Amerika no Prezidente Amérika husu ba Prezidente Banku mundiál atu halo kalkulasaun benefísiu ekonómika,” nia haktuir.

Dokumentu sira barak maka espalla iha nasaun sira liuhosi serbisu korrespondénsira durante invazaun no bainhira Governu hakarak husu presiza enkuadramentu jurídiku atu proteje.

“Iha Timór ita laiha lei arkivu nasionál, tanba lei ne’e maka sei determina. Ita laiha ekuadramentu legál atu arkiva maka sira la sente seguru atu haruka dokumentu sira ne’e mai ita,” nia akresenta.

Entidade sira mós argumenta bainhira sira manda dokumentu arkivu bá Timór no laiha baze legál atu proteje utilizasaun maka bele sai konflitu.

“Tanba ne’e maka ha’u hanoin, atu asegura segredu ou la segredu inklui direitu ema-nia ba informasaun, maka presiza mós lei asesu informasaun atu determina katak ne’e segredu Estadu no la’ós segredu Estadu,” nia fó hanoin.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here