Prezidenti Parlamentu Nasional, Aniceto Guterres Imajen Tatoli/Antonio Goncalves.

DILI, 16 outubru 2020 (TATOLI)—-Prezidente Parlamentu Nasionál, Deputadu Aniceto Longuinhos Guterres Lopes, husu halo revizaun ba Planu Estratéjiku Dezenvolvimentu Nasionál (PEDN) tanba durante ne’e hatudu frakeza barak iha setór agrikultura.

Deputadu Aniceto Guterres haktuir, hafoin tinan 18 restaurasaun independénsia, agora to’o ona Governu VIII ne’ebé gasta ona fundu minarai kuaze biliaun $14 maibé laiha mudansa iha progresu dezenvolvimentu.

Nia dehan, oras ne’e preokupasaun boot liu mak pandemia COVID-19 ne’ebé hamoris krize saúde mundiál, redús atividade ekonómika iha produsaun agríkola.

Nia afirma, situasaun ne’e potensialmente kontribui ka haboot vulnerabilidade hamlaha no haboot má-nutrisaun. Krize saúde, hamlaha no má-nutrisaun nu’udar keda (queda) nasionál ne’ebé la deside opsaun polítika.

Prezidente Parlamentu Nasionál esplika, Planu Estratéjiku Dezenvolvimentu Nasionál determina to’o 2030 Timor-Leste sei livre hosi hamlaha, má-nutrisaun hodi atinje moris saudável tanba iha PEDN konsidera seguransa alimentár no nutrisionál nu’udar prioridade ida iha dezenvolvimentu nasionál.

“Situasaun alarmante hatudu frakeza iha setór agrikultura, dezafia ita-nia medida polítika no estratéjika ne’ebé ita iha ona, rekoñese ita-nia frakeza no remodela meta sira iha Planu Estratéjiku Dezenvolvimentu Nasionál. Iha-ne’e ita hotu konjuga ita-nia potensialidade tomak hodi foti medida adekuada, haree fila-fali polítika, medida ne’ebé iha ona no revé meta iha Planu Estratéjiku Dezenvolvimentu Nasionál,” Deputadu Aniceto Guterres, ko’alia asuntu ne’e iha ámbitu selebrasaun loron mundiál ai-han, iha Sentru Konvensaun Dili (CCD-sigla portugés), sesta ne’e.

Aniceto Guterres subliña, ho situasaun hirak ne’e tenke hatudu vontade no kompromisu polítika tenke forte no koordenadu hodi hasoru keda (queda) nasionál ida-ne’e.

Prezidente Parlamentu Nasionál akresenta, polítika seguransa alimentár ne’ebé elabora iha 2005 iha mandatu I Governu Konstitusionál no tinan 2014 Timor-Leste hamutuk nasaun CPLP sira lansa planu asaun nasionál zero fome iha reuniaun xefe estadu CPLP nian.

Nune’e Iha 2017 Governu aprova polítika ba seguransa alimentár, nutrisionál no soberania ai-haan iha Timor-Leste.

Iha loron 17 setembru 2020 liubá, Bankada Frente Revolussionária de Timor-Leste Independente (FRETILIN) husu re-avalia Planu Estratéjiku Dezenvolvimentu Nasionál (PEDN) tanba meta sira iha planu refere labele atinje no ultrapasada.

Reprezentante Bankada FRETILIN, Deputadu Joaquim dos Santos, fundamenta situasaun globál ho pandemia Covid-19, Timor-Leste konsege halo prevensaun ba ita-nia povu ho implementasaun Estadu Emerjénsia.

Nune’e Covid-19 iha Timor-Leste sai de’it surtu no laiha transmisaun lokál ba komunidade, maski nune’e Timor-Leste tenke nafatin alerta tanba dadus atuál hatudu nasaun balun iha rejiaun maka sai sentru ba propagasaun Covid-19.

Bankada FRETILIN observa ba situasaun ne’e fó biban ba Timor-Leste hodi halo reflesaun hodi haree ba frajilidade sira.

“Liuliu atu hahú hanoin, oinsá bele minimiza ita-nia dependénsia ba rai-li’ur kuaze iha setór hotu hahú hosi ekonomia, agrikultura no peska, saúde, edukasaun nomós seluk tan. Ita presiza re-avalia PEDN liuliu tanba meta sira labele atinje ona no ultrapasadu. Katak tenke revitaliza fali planu sira, prioritiza ba diversifikasaun ekonómika hodi investe ba área poténsial sira seluk, hodi la depende deit ba minarai,” Deputadu Joaquim dos Santos levanta liuhosi sesaun solene abertura lejizlativa Datoluk ba Lejizlatura Dalima, iha Parlamentu Nasionál.

Deklarasaun polítika hosi Bankada FRETILIN ne’e akompaña direitamente hosi Prezidente-Repúblika, Francisco Guterres “Lú Olo”, ne’ebé loke sesaun lejizlativa datoluk ba lejizlatura dalima nian iha uma fukun, tersa ne’e.

Bankada FRETILIN fundamenta liután, Timor-Leste L nia rai-bokur ba agrikultura ho luan ektare rihun ba rihun iha kosta-súl no iha parte balun iha kosta-norte.

Tanba ne’e Bankada FRETILIN sente katak, tempu atu Timor-Leste investe seriamente iha setór agríkola, governu tenke harii irrigasaun ho nia sistema ne’ebé bele asegura dezenvolvimentu setór importante ida-nee.

Nune’e mós harii barrajen sira ho dimensaun natoon ne’ebé bele rekolla bee iha tempu udan atu la husik bee suli hotu ba tasi. Governu mós tenke insentiva setór bankáriu halo injesaun kapitál ho jurus atrativu atu dada no dudu setór privadu ba investe iha agrikultura.

“Tempu atu Timor-Leste afirma nia-aan hanesan Estadu soberanu hodi kore-aan hosi dependénsia totál no eskluziva hosi rai-li’ur. Tanba laiha estratéjia polítika ida-ne’ebé mosu atu reforsa ita-nia independénsia maibé hametin liután ita-nia dependénsia ba rai-li’ur. Karik tanba ida-ne’e mak iha tinan 12 nia laran Estadu gasta biliaun $14 maibé setór produtivu sira hanesan agrikultura no turizmu sei hakdasak hela hamutuk ho edukasaun no saúde,” Bankada FRETILIN kestiona.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here