Deputadu Patrocínio dos Reis Fernandes. Imajen/Espesial.

DILI, 15 outubru 2020 (TATOLI)—Vise-Xefe Bankada Congresso Nacional da Reconstrução Timorense (CNRT), Deputadu Patrocínio dos Reis Fernandes, hateten laiha inimigu no amigu permanente iha mundu polítika tanba partidu polítiku hotu-hotu iha interese.

“Polítika bele dinámiku, iha polítika ema dehan laiha inimigu no amigu permanente. Saida mak permanente ne’e interese. Agora interese ne’e mak partidu idak-idak define ninia interese,” Vise-Xefe Bankada CNRT, Deputadu Patrocínio dos Reis Fernandes, informa ba jornalista sira, iha resintu Parlamentu Nasionál, kinta ne’e.

Deputadu Patrocínio dos Reis Fernandes hateten, se partidu ida mai ho ninia prinsípiu hodi kaer ba konsisténsia hodi defende legalidade, defende konstituisaun no defende interese povu nian, ida-ne’e mak interese.

“Hosi interese ne’e mak hodi ita bele halo konsentrasaun polítika no bele mós lori ita ba fatin ida. Se ita halo definisaun interese ida hanesan ne’e talves la lori ita atu hasoru malu iha fatin ida,” nia hateten.

Nia fó hanoin, iha tinan 2007 to’o 2012 partidu CNRT hamutuk ho Partidu Demokrátiku (PD) forma Governu Aliansa Maioria Parlamentár (AMP).

Iha tinan 2012, tuir nia, PD ho CNRT kontinua forma AMP maibé iha 2015 mosu remodelasaun iha V Governu Konstitusionál mak PD sai” no partidu FRETILIN envolve iha laran hodi hamosu VI Governu Konstitusionál. Iha momentu ne’e Primeiru-Ministru mak Rui Maria de Araújo no envolve mós kuadru partidu FRETILIN balun iha laran.

Iha tinan 2017, Partidu FRETILIN no PD forma Governu ida maibé lakleur Prezidente Repúblika disolve Parlamentu Nasionál hodi hakat ba Eleisaun Antesipada (EA).

Liuhosi rezultadu EA ne’e Partidu CNRT, Partidu Libertasaun Populár (PLP) no Kmanek Haburas Unidade Nasionál Timor Oan forma VIII Governu Konstitusionál, iha momentu ne’e partidu FRETILIN vota kontra programa VIII Governu nian orsamentu.

Iha tempu VIII Governu Konstitusionál ne’e konsege aprezenta OJE 2020 iha 2019 ho montante biliaun $1.1995 maibé Governu deside retira proposta ne’e relatóriu no pareser hosi Komisaun C (Finansa Públika) konsidera proposta ne’e la estruturadu no inskonstitusionál. Nune’e Governu kumpre rekomendasaun PN nian hodi redús ba biliaun $1,668.

Proposta ne’e Governu aprezenta hikas ba PN iha 19 dezembru 2019 maibé iha loron ikus faze espesialidade orsamentu ne’e la pasa. Proposta OJE ho montante Biliaun $1,668 la pasa iha jeneralidade loron datoluk, iha loron-sesta (17/1/2020) ho rezultadu votasaun a-favór 13, kontra 15 no abstesaun 25.

Hafoin OJE 2020 la pasa, Prezidente Repúblika Francisco Guterres “Lú Olo” fó opsaun tolu ba forsa polítiku parlamentár sira, ida mak diálogu, rua partidu polítiku asentu parlamentár buka-malu no ikus liu mak Eleisaun Antesipada.

Iha loron 20 fevereiru, PD liuhosi desizaun konferénsia estraordinária hodi hamutuk ho CNRT forma koligasaun foun maibé iha loron 7 maiu 2020, Prezidente PD, Maria Assanami “Sabino,” liuhosi Konferénsia Imprensa apoia kualkér Governu.

Iha loron sábadu (7/3/2020) Partidu CNRT reafirma pozisaun liuhosi konferénsia estraordinária ida hodi hamutuk partidu lima forma koligasaun bazea ba ejizénsia Prezidente-Repúblika, Francisco Guterres ‘Lú Olo’.

Iha loron 7 marsu 2020 ne’e mós KHUNTO deklara liuhosi Kongresu Nasionál hodi integra hamutuk ho CNRT iha koligasaun foun maibé iha loron 29 fulan-abríl 2020, KHUNTO deklara sai hosi koligasaun ho razaun atu mantein apoia ba VIII Governu Konstitusionál no respieta Xanana maibé KHUNTO hadomi liu povu.

Entretantu partidu PUDD, UDT no FM hala’o konferénsia extraordiária hamutuk ho CNRT bazeia ba pedidu Prezidente Repúblika, iha loron Domingu (8/3/2020).

Ho opsaun ne’ebé Xefe Estadu propoin, Partidu Neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu (22/2/2020), iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides.

Purtantu Koligasaun foun ne’e lidera hosi Prezidente CNRT, Xanana Gusmão hasoru Prezidente-Repúblika, Francisco Guterres ‘Lú Olo’ iha loron 6 marsu 2020.

Nune’e iha loron 10 fulan-marsu, portavos koligasaun foun, António da Conceição ‘Kalohan’ aprezenta karta foun hodi husu audiénsia ho xefe estadu ba daruak nian, maibé Xefe Estadu la resposta.

Prezidente-Repúblika (PR), Francisco Guterres ‘Lú Olo’ simu karta demisaun hosi Xefe Governu iha loron domingu (24/2/2020) no Primeiru-Ministru, Taur Matan Ruak rasik deklara karta demisaun ne’e iha loron segunda (25/2/2020).

Iha loron kuarta, 08 abríl 2020, Primeiru-Ministru, Taur Matan Ruak, retira nia karta demisaun tanba ho razaun surtu COVID-19.

Iha loron 21 marsu 2020, Sekretariu Jerál FRETILIN, Marí Alkatiri no Prezidente PLP atuál PM VIII Governu Konstitusionál, Taur Matan Ruak, asina Plataforma Entendimentu entre partidu rua hodi mantein Taur Matan Ruak hanesan Xefe Governu hodi hakotu mandatu iha 2023 no la konkorda Eleisaun Antesipada.

Rezultadu Plataforma Entendimentu ne’e partidu KHUNTO refire hosi koligasaun foun ne’e hodi ba hamutuk plataforma ne’e hodi defende VIII Governu to’o hakotu mandatu iha 2023.

Nune’e OJE 2020 foin aprezenta iha 15 setembru no hetan aprovasaun hosi Parlamentu Nasionál iha loron 08 outubru 2020 ho montante biliaun $1.497,1. Proposta orsamentu ne’e aprova ho rezultadu votasaun a-favór 43, kontra 21 no abstensaun 1. Votu kontra 21 ne’e maioria hosi Bankada CNRT.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here