Jogadór hosi AS Marca tenta hasai bola hosi jogadór Lalenok United FC nia ain. Imajen/Mídia FFTL

GLENO, 15 outubru 2020 (TATOLI) – Ekipa jigante Lalenok United FC susesu hakat ona ba semi finál ka kuatru finál kopa Federasaun Futeból Timor – Leste (FFTL) hafoin manán AS Marca ho golu 6-0.

liuhosi jogu kopa FFTL ba oitavu final nian, ohin loraik, hala’o iha Estádiu Café Gleno, Lalenok United FC hatudu nia performance jogu bonitu “tic-tac” hodi halo nia adversáriu AS Marca “ulun-ain”.

Hanesan baibain, jogu hahú ekipa rua lansa kedan kontra ho atake ba malu hodi buka hatama golu. Persegisaun maka’as hatudu hosi jogadór parte rua nian, maibé “dewi fortuna” pertense liubá Lalenok hodi fura kedas golu 6 ba AS Marca nia baliza.

Hosi rezultadu ne’e, AS Marca obrigadu tenke hakotu ona nia viajen iha kopa FFTL. Enkuantu Lalenok avansa ona ba oin hodi hein fali klube Boavista FC Timor no Karketu FC Dili ne’ebé sei hala’o jogu iha estádiu hanesan, sabadu   (17/10).

Golu ne’ebé termina vitória Lalenok prodús hosi Jogadór Elias Mesquita (10) iha minutu ’11, ’90+5,  Hermínio Sousa (15) ’45+2, ’62, Daniel Adadi ’72, Paulo Gally ’87.

Jogu refere dirije hosi árbitru Pedro Maia Carvalho, juiz liña Elísio Lopes, Paulo da Costa no árbitru rezerva Jaime Gonçalves.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here