Feto Timór. Imajen/Espesiál

LIQUIÇÁ, 15 outubru 2020 (TATOLI)—Vise-Prezidente Parlamentu Nasionál, Maria Angelina Lopes Sarmento, hateten Grupo das Mulheres Parlamentares de Timor-Leste (GMPTL) sei halo esforsu nune’e iha tempu badak bele finaliza rezolusaun parlamentár kontra asédiu sexuál hasoru feto no labarik feto sira iha domíniu públiku.

“Ho rezolusaun ne’e, feto sira ho liberdade no kreatividade tomak bele kontribui di’ak liután ba dezenvolvimentu oin-oin iha rai doben Timor-Leste,” Deputada Bankada PLP informa iha ámbitu komemorasaun loron mundiál feto rurál iha suku Dato, kinta ne’e.

Deputada Bankada Governu ne’e hatutan, grupu parlamentár sei sai nafatin parseiru ba feto rurál sira no parseiru dezenvolvimentu atu hamosu kondisaun di’ak.

Iha fatin hanesan, Prezidente GMPTL, Lídia Norberta kongratula feto sira iha área rurál ne’ebé komemora loron mundál no enkoraja maluk feto sira atu hamutuk dezenvolve kapasidade.

“Ha’u hakarak hato’o parabéns ba feto maluk sira iha área rurál  Timór laran tomak, mai ita hamutuk dezenvolve kapasidade feto maluk sira iha área rurál no fó mós oportunidade hodi bele haknaar-an iha área ekonómia no área seluk,” Deputada Bankada FRETILIN ne’e tenik.

Nune’e mós, Reprezentante Prezidente Autoridade munisípiu Liquiçá, João Alegre, konsidera Parlamentu Nasionál iha inisiativa di’ak hodi hamosu grupu feto parlamentár, nune’e bele dudu feto sira iha área rurál hetan oportunidade hodi envolve iha kualkér atividade.

Reprezentante ne’e sujere atu Governu aselera prosesu dezenvolvimentu nasionál no aselera polítika dezentralizasaun administrativu.

“Governu presiza aselera polítika desentralizasaun, nune’e bele fó oportunidade ba feto potensiál iha musípiu to’o área rurál bele envolve iha kualkér atividade. Labele buat hotu-hotu sentraliza iha nasionál,” João Alegre fó hanoin.

GMPTL komemora loron mundiál hamutuk ho inan-feton iha SUKU Dato no Loidahar, postu administrativu Liquiçá, munisípiu Liquiçá, ho tema nasionál ‘investe iha ekonomia rurál sei hamosu rezisténsia no bele aselera dezenvolvimentu inkluzivu’ no ba GMPTL rasik ho tema ‘haforsa produsaun iha agrikultura, ai-han seguru, nutrisaun no harii reziliénsia ba COVID-19’.

Partisipa iha serimónia ne’e maka, Sekretáriu Estadu Kooperativa, Elizário Ferreira, Sekretária Jerál Parlamentu Nasionál, Reprezentante Embaixadór Austrália iha Timor-Leste, estudante,  veteranu, autoridadade lokál, entidade seguransa no defeza, inklui populasaun sira. 

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here