Rspoza Prezidente Repúblika, Cidália Mouzinho Nobre Guterres. Imajen TATOLI/Osoria Marques.

AILEU, 15 outubru 2020 (TATOLI)–Komunidade Laulara hamutuk sosiedade sivíl no organizasaun feto sira, ohin, selebra loron internasionál Feto Rurál ho tema “Haforsa Rezilénsia Feto Rurál HEudansa Klimátika” iha Postu Administrativu Laulara, Munisípiu Aileu.

“Ho selebrasaun Loron Internasionál Feto Rurál ne’e ha’u kongratula feto rurál iha Timor-Leste,” dehan espoza Prezidente Repúblika, Cidália Mouzinho Nobre Guterres,  liuhosi nia diskursu iha ámbitu selebrasaun Loron Internasionál Feto Rurál ne’ebé selebra iha Postu Administrativu Laulara, Munisípiu Aileu, kinta ne’e.

Nia dehan, tema global selebrasaun Loron Internasionál Feto Rurál nian ba tinan 2020 mak “Feto Rural no Feto Foinsa’e harii rezilensia” (Rural Women and Girls building Resilience).

Espoza Prezidente Repúblika, Cidália Mouzinho Nobre Guterres, hateten tema ida-ne’e relevante ho kontestu mundu global ohin loron nian hodi haree kona-ba knaar importante feto rurál sira-nian luta hasoru surtu COVID-19 no mudansa klimátika.

Imajen TATOLI/Osoria Marques.

“Tanba hosi relatóriu sira ne’ebé ita asesu no públika iha mídia sosiál, haree katak durante períodu surtu COVID-19 iha fatin barak iha mundu, feto no labarik feto iha área rurál mak sofre liu tanba lahetan asesu ba tratamentu saúde adekuadu, aimoruk, bee-moos no saneamentu báziku, menus asesu ba informasaun tanba sofre hosi izolamentu no konsumu rumores oin-oin iha sira-nia leet no menus asesu ba teknolojia atu hadi’a di’ák liután sira-nia moris,” nia hateten.

Tanba, nia hatutan, durante pandemia COVID-19 ne’e feto mak hetan risku boot liu tanba bainhira isin rua ka kous labarik.

“Ha’u no karik feto maluk sira-nia esperiénsia durante pandemia COVID- 19 hatudu katak feto hetan risku boot liu ba COVID-19. Tanba, bainhira feto isin rua ida mak hetan pozitivu ba COVID-19 sei fó ameasa ba ema na’in-rua (2) dala-ida,” Cidalia hateten. 

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here