Exibisaun fotografia komemora loron Balibo Five iha Balibo, kinta (15/10). Imajen Tatoli/Antónia Gusmão

BOBONARO, 15 outubru 2020 (TATOLI)Centro Nacional Chega (CNC) hamutuk ho Conselho de Imprensa (CI) komemora tinan 45 trajédia Balibo Five iha postu administrativu Balibo, Munisípiu Bobonaro, hahú loron 15 to’o 16 outubru ho atividade ezibisaun fotografia no seluk tan.

Diretór CNC, Hugo Fernandes, hateten ezibisaun ne’e nu’udar aktu komemorativu ba trajédia ne’ebé akontese tinan hirak liubá.

“Atu fó hanoin iha konflitu ne’ebé de’it sempre envolve ema no buat balun hetan estragu. Ita-nia konflitu hahú kedan iha agostu 1975 to’o 1999, ne’ebé ema rihun ba rihun sakfika-an hodi ezerse direitu ba auto determinasaun, hanesan direitu ne’ebé maka moris nanis bainhira ema ida hahú moris iha mundu no povu Timór hatudu durante tinan 25,” Diretór CNC hateten iha loron dahuluk komemorasaun trajédia Balibo Five iha Balibo, kinta ne’e.

Jornalista Balibo Five. Imajen/Espesiál

Nia konsidera, atividade ne’e atu dignifika luta naruk aleinde mai hosi mundu jornalizmu nian, maibé mós partisipasaun ativu signifikante hosi komunidade.

“Komunidade ho hanoin ba moris di’ak no livre hosi tauk, ida ne’e maka independénsia tanba livre hosi tauk mak forma ida hosi nasionalizmu,” nia akresenta.

Biban ne’e, Hugo Fernandes agradese ba prezensa Governu no eis Prezidente Repúblika, José Ramos Horta inklui komunidade Balibo iha komemorasaun loron importante ne’e.

Fatin hanesan, Prezidente CI, Virgílio Guterres, hateten Balibo agora bá-oin tenke sai espasu hodi hato’o lia-loos.

“Lia-loos la’ós kona-ba pasadu maibé ba jornalista sira no mós ita-nia ukun-na’in sira,” nia fó hanoin.

Órgaun independente ne’e iha ambisaun boot atu diskute ho nai-ulun sira, kada tinan iha 16 outubru sai hanesan eventu annuál iha Balibo.

Tanba ne’e, parte CI buka koopera ho instituisaun Estadu sira hanesan Ministériu Administrasaun Estatál (MAE) no instituisaun seluk atu ba oin kada tinan fó apresiasaun ba Komunikasaun Sosiál no sakrifísiu jornalista na’in-lima inklui jornalista seluk ne’ebé durante tempu okupasaun to’o independénsia sempre halo kobertura situasaun Timór ba mundu tomak.

Enkuantu iha komemorasaun trajédia ne’e realiza mós prémiu jornalístiku ne’ebé boot liu maka Balibo Five, maski antes ne’e asosiasaun jornalista sira halo ona maibé liuhosi biban ne’e atu eleva di’ak liu prémiu nia valór.

Lansamentu espozisaun produtu jornalíztiku, iha Balibo, kinta (15/10). Imajen Tatoli/Antónia Gusmão

Eventu ne’e partisipa hosi Ministru Asuntu Parlamentár no Komunikasaun Sosiál, Francisco Jerónimo no membru Governu balun, reprezentante komando Polísia Nasionál Timor-Leste (PNTL), reprezentante komandante Polísia munisípiu Bononaro, reprezentante Instituto Defeza Nasionál (IDN), reprezentante Primeiru-Ministru inklui komunidade Balibo.

Tuir ajenda iha sesta (16/10) hosi tuku 08:00 to’o kalan, sei iha misa iha Igreja Balibo, programa kafé dadeer, debate públiku kona-ba ‘papél mídia iha konstrusaun Estadu’ ne’ebé sei envolve oradór lima, jogu amizade, live talk show ho tópiku ‘papél mídia iha konstrusaun Estadu (asegura pás no promosaun direitu umanu)’, kari aifunan no sunu lilin, atribuisaun prémiu jornalizmu ba Pás Maria Gorreti, anúnsiu manan na’in no apresiasaun ba josnalista.

Entretantu, iha loron 16 outubru 1975 mosu trajédia iha Balibo ne’ebé jornalista australianu no neozelandeze na’in-lima hetan oho hosi militár indonéziu bainhira halo knaar jornalizmu atu transmite ba kanál televizaun australianu, ne’ebé ikusmai trajédia ne’e koñesidu ho Balibo Five.

Jornalista hirak ne’e maka Greg Shackleton (reportér), Tony Stewart (gravadór lian), Gary Cunningham (cameraman) hosi mídia HSV-7 (Seven Network) Melbourne, no Brian Peters (cameraman) no Malcolm Rennie (reportér) hosi mídia TCN-9 (Nine Network) Sydney,

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here