Komandante PNTL Munisípiu Dili, Superintendente Henrique da Costa, ho nia adjuntu Superintendente Euclides Belo, hasai fotografia ho Diretór Eskola Ensinu Sekundária Jerál no Diretór Eskola Tékniku Vokasionál, hafoin sosializa programa “Polísia Ba Eskola”, iha Komandu PNTL, Caicoli, Dili, 14 outubru 2020. Imajen Tatoli/Eugénio Pereira

DILI, 14 outubru 2020 (TATOLI)- Komandu Polísia Nasionál Timor-Leste (PNTL) Munisípiu Dili, ohin, realiza enkontru ho Diretór Eskola Ensinu Sekundáriu Jerál no Diretór Eskola Tékniku Vokasionál hamutuk 29 iha kapitál Dili hodi introdús programa “Polisia Ba Eskola” atu garante paz no estabilidade seguransa iha eskola sira.

Notísia Relevante : PD husu MEJD garante ambiente seguru iha eskola sira

Sensibilizasaun programa “Polísia Ba Eskola” ho tema “Servisu Hamutuk Hodi Garante Paz no Estabilidade Seguransa iha Kapitál Dili” hetan partisipasaun másimu hosi diretór eskola sira no prontu servisu hamutuk ho polísia atu  sensibiliza edukasaun di’ak ba alunu sira hodi kumpre regra eskola nian no evita kazu konfrontasaun entre estudante.

Komandante PNTL Munisipiu Dili, Superintendente, Henrique da Costa, ne’ebé lidera diretamente programa sensibilizasaun ne’e dehan,   sensibilizasaun informasaun ne’e importante hodi edukadór sira toma atensaun kontrola estudante sira eskola  hotu- hotu.

“Ami introdús ba diretór eskola sira kona-ba programa “Polísia ba Eskola” envolve polísia Seksaun Tránzitu nian, Polísia Komunitáriu hodi sensibiliza informasaun ba estudante no manorin sira, oinsá sira bele prepara estudante sira iha ida-idak nia eskola atu evita problema ka konfrontasaun entre estudante sira,” Komandante Henrique hateten ba jornalista iha Komandu PNTL, Caicoli, Dili.

Nia hatutan, PNTL observa durante ne’e kazu konflitu la’ós mosu de’it iha arredores universidade sira, maibé akontese mós konflitu entre estudante sira iha Eskola Ensinu Sekundáriu Jerál no Eskola Tékniku Vokasionál sira.

Eis Komandante PSIK ne’e hatutan, durante PNTL identifika eskola públiku balun hanesan Kristál, São José Operario, Nobel da Paz, Eskola Finantil no Eskola 30 Agostu, Comoro, risku ba kazu krime tanba estudante sira sempre envolve iha konfrontu.

Iha ekontru ne’e, Komandu Polísia Seksaun Tránzitu Dili mós sensibiliza Lei Kódigu Estrada tuir Dekretu lei númeru 6/2003, loron 03 abril, ba manorin sira atu fó avizu ba estudante sira bainhira kondús  motór tenke uza kapasete  no labele tula malu barak hodi evita asidente tráfegu.

Komandante Henrique hatutan, kuaze loro-loron Polísia halo apreensaun ba motorizada identifika alunu barak maka komete infrasaun ho kazu lori motór tula malu la uza kapasete, la iha dokumentu no la iha karta kondusaun.

Iha fatin hanesan, Diretór Jerál Eskola Sagrado Coracão de Jesus, Becora, Padre Domingos Godinho, hato’o agradese ba PNTL Dili hodi sensibiliza informasaun programa “Polísia Ba Eskola”.

Padre Domingos konsidera programa “Polísia Ba Eskola” importante tebes hodi fó edukasaun no sosializa servisu PNTL tuir artigu 147 kona-ba polísia defende legalidade demokrátika no garante seguransa interna ba sidadaun hotu no prevene  krime bazeia ba respeitu direitus umanus.

Tuir nia haree, ohin loron  alunu barak iha sidade Dili ba eskola la tama eskola no ho farda ba tuur fali iha tasi ibun no lori karreta no motór la’o pasiar iha sidade Dili presiza tebes atu hetan edukasaun moral hosi inan-aman no PNTL.

“Servisu hamutu entre diretór eskola sira no polísia importante, tanba ita bele koopera atu kontrola estudante sira. Basa, alunu balun nakar, inan-aman ko’alia sira la rona no mai eskola profesór sira ko’alia sira la rona mós,” dehan Padre Domingos.

Nia hatutan, atu lori Dili sai sidade hakmatek, presiza mós estudante eskola hotu- hotu nia kontribuisaun.

Diretór Eskola Sekundáriu Nobel da Paz, Pedro Nunes Menezes, hateten sira prontu koopera ho PNTL atu asegura paz.

Nia rekoñese Eskola Nobel da Paz ne’e kada tinan sempre mosu konflitu entre estudante presiza tebes prezensa PNTL atu koopera no sosializa knaar PNTL nian ba alunu sira.

“Loos duni, ha’u nia eskola ne’ebá sempre mosu beibeik problema, no dala ruma mosu mós problema iha Universidade Dili ho komunidade sira envolve mós ha’u nia estudante balun,” nia hateten.

Iha enkontru ne’e diretór eskola sira propoin mós ba PNTL atu kontrola estudante sira ne’ebé iha tempu eskola ba tuur iha tasi-ibun ka pasiar uza farda tenke detein hodi fó edukasaun ba alunu sira, inklui kontrola mós estudante barak ohin loron ba eskola fuma sigarru no hemu tua iha fatin públiku sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here