rezidente Komisaun A (Justisa no Konstitusionál), Deputadu Joaguim dos Santos. Imajen TATOLI/Evaristo Soares Martins.

DILI, 14 outubru 2020 (TATOLI)–Prezidente Komisaun A (Justisa no Konstitusionál), Deputadu Joaquim dos Santos, sei ajenda lei podér lokál atu diskute iha tinan 2021.

“Komisaun A iha ona ajenda ida kona-ba lei podér ne’e maibé ha’u planu hela ba 2021. Iha janeiru no fevereiru 2021, ita hahú diskute tanba lei ne’e uluk Prezidente Repúblika veta entaun deputadu sira foti fali hodi halo inisiativa foun,” Deputadu Joaquim dos Santos informa ba jornalista sira iha edifísiu CVTL, Bairru dos Grilhos, Suku Grincenfor, Dili, kuarta ne’e.

Prezidente Komisaun A ne’e fundamenta, lei podér lokál ne’e presiza iha duni nune’e podér ne’e bele to’o iha baze tanba dezenvolvimentu hosi nasionál de’it la la’o.

“Ita tenke kria kondisaun ba munisípiu sira hanesan lei podér lokál ne’e, lei ba eleisaun munisipál. Bainhira lei podér lokál ne’e aprova karik sei hadi’ak lei ba xefe suku sira hodi halo asimiliasaun normativu ruma. Depois hanoin mós atu halo lei ba orsamentu munisipál nian. Lei hirak ne’e tenke iha pakote ida,” nia dehan. 

Prezidente Komisaun A ne’e hakarak pakote sira hosi lei podér lokál ne’e tenke konsensu hosi forsa polítiku sira iha Parlamentu Nasionál.

“Ida-ne’e ha’u luta hela atu iha konsensu katak 2021 ne’e ita bele adianta ona buat ruma kona-ba lei podér lokál ba munisípiu sira. Iha 2022 ne’e, munisípiu balu bele halo ona eleisaun,” nia hateten. 

Maske Komisaun A ajenda ona maibé Deputadu Joaquim dos Santos, dehan dalaruma derrepente mosu proposta urjénsia ruma hosi Govrnu entaun ajenda prioridade sira-ne’e bele adia hotu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here