Lider Istoriku, Kay Rala Xanana Gusmão, Francisco Guterres Lú Olo ho Mari Alkatiri. Imajen/Eugénio Pereira

DILI, 12 outubru 2020 (TATOLI)—Eis Prezidente Repúblika, Kay Rala Xanana Gusmão, halo análize hodi hasai konkluzaun hitu (7) ba situasun polítiku hahú hosi 2017 to’o 2020.

Xanana Gusmão sente iha obrigasaun atu hato’o ezemplu balu hosi faktu konkretu kona-ba inserteza polítiku ne’ebé afeta povu no nasaun.

“Atu estimula ka ajuda reflesaun krítika kona-ba situasaun ne’ebé ita bolu “krize polítika atual”, nune’e mó ha’u hakarak simu reptu ka dezafiu ne’ebé Prezidente Repúblika hasai iha abertura ba Sesaun Lejizlativa Datolu ba V Lejizlatura Parlamentu Nasionál, iha-ne’ebá, nia apela atu reforsa konseitu kona-ba sidadania partisipativa no responsável. Konseitu kona-ba sidadania partisipativa no responsável maka autoriza no fó direitu, dever ba Fakuldade Siénsia Sosiál atu-bele hasai inisiativa atu promove semináriu ida-ne’e. Hanesan Prezidente rasik mós dehan iha sosiedade demokrátika ho kompleksidade ne’ebé aumenta ba beibeik, hanesan ita-nian ne’e. Prosesu lejitimasaun ka prosesu atu fó ka hetan lejitimidade sai esensiál obriga atu entende didi’ak se podér ne’e lejítimu no kredível duni,” Xanana Gusmão ko’alia kestaun ne’e bainhira sai oradór ba semináriu ne’ebé organiza hosi Universdade Nasionál Timor Lorosa’e (UNTL) liuhosi Fakuldade Siénsia Sosiál hala’o semiáriu ida ho tema “Com o espírito nacionalismo e patrotísmo desta comunidade académica da FCS-UNTL no âmbito de comemorar XX aniversário da UNTL ho sub-tema “um país, um povo e uma identidade”, iha Salaun Ian martin INFOREPE, Balide, foin lalais ne’e.

Xanana Gusmão hateten, se ezijénsia atu haree ba ne’e laiha,ema nunka bele hatene ‘poder polítiku’ ne’ebé mosu ka hatuur hela poder ne’e lejítimu no kredível ka lae.

Ho situasaun polítiku ne’ebé hahú hosi 2017 to’o oras ne’e, Kay Rala Xanana Gusmão halo análize ho konkluzaun hitu (7) hanesan tuir mai ne’e:

Dahuluk, iha 2017, partidu FRETILIN manán tiha eleisaun maibé la konsege garante maioria parlamentár. Iha kedas bainhira hahú hotu-hotu bele haree katak Primeiru-Ministru indijitadu la konsege halibur konsensu polítiku ho PLP no KHUNTO atu simu ninia projetu atu kaer ukun nune’e mós, Prezidente RepúbliKa nomeia Mari Alkatiri no fó pose ba governu minoritáriu.

Xanana halo konkluzaun: opozisaun iha Parlamentu Nasionál mak hetan maioria absoluta. Governu, ne’ebé, tuir liafuan ne’ebé Prezidente Repúblika rasik hasai katak hetan ninia lejitimidade no sustentabilidade hosi Parlamentu Nasionál rasik, Governu ne’e la konsege hahú efetivamente ninia funsaun, nein bele kontinua tanba ninia programa la hetan aprovasaun.

Daruak, tinan ida liutiha, iha 2018, hala’o eleisaun antesipada no maioria koligasaun nian ne’ebé uluk iha opozisaun tinan ida tomak, ne’ebé Prezidente Repúblika la fó oportunidade atu forma Governu mak manán eleisaun.

Primeiro-Ministru, Taur Matan Ruak,  indijitadu hosi maioria parlamentar no haktuir norma hosi Konstituisaun propoin ba Prezidente Repúblika membru Governu sira seluk. Maibé, nu’udar prezidente istóriku ida, exelénsia lakohi fó pose ba elementu na’in-sia (9) hosi Governu foun ne’e. La liga tiha kedas ba prinsípiu ‘prezunsaun inosénsia’, prinsípiu ne’ebé Konstituisaun rasik prevee no tau tán alegasaun kona-ba ‘perfis étikus ne’ebé kontroversus’, Prezidente ne’e mantin ninia pozisaun hosi 2018 to’o 2020.

Xanana halo konkluzaun: membru Governu na’in sia, propostu hosi Aliansa Maioria Parlamentár (liuliu, sira hosi CNRT, partidu boot liu iha aliansa ne’e) la hetan pose. Ne’e hotu apezar de ‘reprezentatividade no lejitimidade’ mak sai nu’udar ‘ingredientes ne’ebé krusiál tebes ba demokrasia’. Liafuan sira-ne’e sai hosi Prezidente Repúblika nia ibun. Ho sitasaun sira ne’ebé oin temi daudauun, pergunta ida mosu iha “ha’u-nia ibun: nia komprende ka lae saida mak ema hakerek iha diskursu, ne’ebé nia bá lé iha Parlamentu Nasionál”?

Datoluk, iha 17 janeiru 2020, proposta-lei ba Orsamentu Jeral Estadu ba 2020 la hetan aprovasaun, hafoin halo aprezentasaun ba dala-rua iha Parlamentu Nasionál. Primeiru-Ministru rekoñese katak koligasaun iha Governu ‘la eziste ona’, depois partidu boot liu, iha Aliansa, la fó apou ba orsamentu tanba rekoñese katak Governu laiha kbit atu ezekuta ninia programa.

Xanana halo Konkluzaun: impase polítiku no grave krize institusional hetan konfirmasaun hosi aprezentasaun pedidu demisaun Primeiru Ministru nian ba Prezidente Repúblika, iha 24 fevereiru 2020.

Dahaat, tanba hatene katak Prezidente Repúblika haree ba eleisaun antesipada hanesan rekursu ikus liu hodi husu ba forsa polítika ho asentu parlamentár atu buka solusaun ba impase polítiku, ne’ebé mak mosu Aliansa Maioria Parlamentár foun ida iha 22 de fevereiru.

Iha 27 de fevereiru, Aliansa foun ne’e ba aprezenta formalmente ba Prezidente Repúblika tanba Aliansa ne’e fiar katak nia iha kondisaun atu forma Governo foun ida, iha tempu ne’ebé badak no bele servisu maka’as atu aprova Orsamentu Jerál Estadu 2020 hanesan krize institusional iha País ezije hela.

Prezidente loke, dala ida tan, presedente foun ida iha istória paíz-nian, hodi husu atu koligasaun foun ne’e tenke aprova hosi kongresu ka Konferénsia nasionál partidu sira. No akontese duni, iha 10 marsu, rekizitu sira kumpre tiha, lori ba Prezidente, no nia haruka informa de’it katak nia presiza tempu atu estuda.

Xanana halo konkluzaun: Presidente-Repúblika la haree katak iha duni urjénsia atu forma Governo foun ida nein konsidera uitoan katak iha ona ‘grave krize institusional’.  Bainhira temi ‘krize institusional’, ne’e katak instituisaun ida hanesan Governu la konsegue funsiona ho efikásia no responsabilidade. Tán ne’e hotu mak nein demisaun Primeiru-Ministru nian, nein proposta ba formasaun Governu foun no indijitasaun Primeiru-Ministru foun ida, merese resposta, verbál ka eskrita hosi Prezidente.

Dalima,  iha 21 marsu 2020, Ministériu Saúde anunsia primeiru kazu COVID-19 konfirmadu iha Timor-Leste. Maibé haree didi’ak, liutiha ona loron neen-nulu resin tolu (63) kona-ba laiha aprovasaun ba orsamentu, situasaun ne’ebé obriga tama iha rejime duodésimu no liutiha ona loron rua-nulu resin-neen (26) kona-ba pedidu demisaun hosi Primeiru-Ministru. Koinsidénsia mak ne’e ka lae, iha loron ne’e duni, 21 marsu, FRETILIN ho PLP mós asina ‘plataforma entendimentu’.

Xanana halo Konkluzaun: enkuantu Prezidente Repúblika estuda artigu 86 no 112 Konstituisaun nian, rejime duodésimu impede ka difikulta asesu hosi empreza ba rekursu finanseiru Estadu nian tanba Estadu labele selu no balun taka no hasai trabalhadór sira, hodi afeta negativamente ba ekonomia, ne’ebé kait ho risku kalamidade públika ne’ebé bele mosu hosi pandemia, kria tebes konsekuénsia ne’ebé grave ba ekonomia no ba Povu.

Daneen, ho ne’e hotu, iha loron 18 ho 19 maiu, ita hotu asiste presedente aat ida,  boot no grave liu, iha ita-nia istória: rungu-ranga iha Parlamentu Nasionál laran hodi destitui Prezidente Parlamentu Nasionál no obriga eleisaun foun ho forma ilegál ba prezidente foun. Buat sira-ne’e hotu ne’ebé sai hanesan golpe ida iha ita-nia ai-riin ba soberania nasioná ne’ebé la hetan liu komentáriu ruma hosi órgaun soberania sira seluk.

Xanana halo konkluzaun: KHUNTO hafoin sai tiha hosi Aliansa foun ba integra fali iha ‘plataforma entendimentu’ hodi bele hamosu maioria foun ida, ne’ebé desidida tebes atu hadau podér ho meiu saida de’it inklui golpe ne’ebé hala’o iha Parlamentu Nasionál ho apoiu hosi forsa polisiál.

Xanana dehan, ida-ne’e kuriozu tebes, Prezidente Repúblika la presiza ona tempu atu estuda no iha 20 Maiu, iha aniversáriu dala-18 ba restaurasaun independénsia, nia informa ba públiku katak ‘plataforma entendimentu’ maka sei permite estabilidade atu ukun, hodi haluha tiha kedas atu fó netik liafuan ruma ba partidu sira-ne’ebé aprezenta, uluk kedas, solusaun ba impase polítiku ne’e. atu fó hatene de’it katak, iha 20 maio, loron ualu-nulu resin tolu (83) mak liutiha ona, atu Prezidente bele fó hatene netik nia pozisaun oinsá ba komunikasaun ne’ebé Aliansa hato’o ba nia kona-ba solusaun governativa ida.

Xanana konsidera estrañu tebes tanba Prezidente Repúblika la ezije ba FRETILIN, PLP no KHUNTO atu sira bele kumpre rekizitu hosi lei partidu politiku, kona-ba kongresu no konferénsia nasionál atu aprova koligasaun.  FRETILIN halo duni konferénsia ida.

Maibé rezolusaun ne’ebé sai fó de’it mandatu ba Sekretáriu Jeral atu halo kontaktu no la ós eksplìsitamente atu tama iha koligasaun ruma, tuir lei partidu polítiku, KHUNTO, atu tama iha nova koligasaun, halo tiha Kongresu maibé ba ‘plataforma’ sira tenke halo fali konferénsia ida no PLP nunka halo konferénsia. Lei partidu polítiku nian determina katak partidu sira bele halibur ka hamutuk iha koligasaun, aliansa, plataforma ka ho naran seluk tan ne’ebé sira hakarak bolu maibé importante mak aprovasaun hosi kongresu ka hosi konferénsia.

Dahitu, ikus liu, durante prosesu ne’e la’o, Xanana deskobre katak labele klarifika dúvida kona-ba konstitusionalidade liuhosi Tribunál Rekursu. Tanba, Tribunál Rekursu interpreta fali ninia podér ho forma taka-aan hodi hatete katak sira labele interfere iha asuntu polítiku. Ita-nia Estadu Direitu Demokrátiku ne’e atu la’o ba ne’ebé loos?

Xanana halo konkluzaun ba pontu ikus liu ne’e,  la-ós de’it deskonfiansa ne’ebé mosu daudaun ona kona-ba posibilidade bele iha duni interese polítiku seluk, iha Xefe Estadu ninia hahalok, hanesan mós ninia podér prezidensiál rasik mak sai forte liután hosi prosesu ida-ne’e. Buat sira né hotu só bele akontese duni, tanba laiha ona dalan atu bele klarifika dúvida kona-ba direitu konstitusionál liuhosi órgaun ne’ebé kompetente, ne’ebé loloos mak tribunál sira no ida-ne’e sai hanesan asuntu krusiál tebes bainhira ita haree katak ita-nia prosesu demokrasia sei boot tan ho dezafiu ne’ebé sei mosu nafatin no mós hasoru kompleksidade oin-oin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here