Sekretária Meza Parlamentu Nasionál, Deputada Lídia Norberta dos Santos Martins, Lidia Norberta dos Santos Martins.

DILI, 12 outubru 2020 (TATOLI)—Parlamentu Nasionál (PN) sei halo apresiasaun ba Lei Protesaun Sivíl ne’ebé Prezidente Repúblika, Francisco Guterres “Lú Olo”, veta no apresiasaun ne’e sei hala’o iha loron 19 outubru, semana oin.

“Plenária iha loron 19 outubru ne’e sei trata asuntu atu halo apresiasaun ba Lei Protesaun Sivíl ne’ebé ita hotu hatene katak Prezidente Repúblika veta,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira hafoin reuniaun líder bankada iha sala konferénsia Parlamentu Nasionál, segunda ne’e.

Parlamentu Nasionál (PN) aprova dekretu-lei númeru 16/V (2a)-Lei Protesaun Sivíl ne’e iha loron 21 jullu 2020 ho rezultadu votasaun a-favór 57, kontra 0 no abstensaun 4.

Prezidente Repúblika, Francisco Guterres “Lú Olo”, veta politikamente dekretu-lei protesaun sivíl tanba kestiona asuntu sira liga ba deklarasaun kalamidade públika no asepeitu iha restrisaun direitu, liberdade no garantia.

Prezidente Repúblika konsidera testu hosi dekretu-lei ne’e tenke pondera ho adekuada, loloos no di’ak no konsisténsia ho lei sira seluk. Xefe Estadu mós konsidera iha situasaun alerta, kontijénsia no kalamidade públika iha dekretu-lei ne’e la sufisiente.

Ho razaun sira hosi Xefe Estadu, Sekretária Meza Parlamentu Nasionál, fó-sai katak segunda agora sei halo apresiasaun ba Lei Protesaun Sivíl ne’e entaun iha apresiasaun ne’e sei mosu diskusaun, hodi diskusaun ne’e mak sei haree atu ba loos ne’ebé.

Maibé antes ne’e mós, Prezidente Komisaun B (Negósiu Estranjeitu, Defeza no Seguransa), Deputadu Agustinho Siqueira “Somoxo“ hateten lei refere esbosa dezde 2010 maibé lori tempu naruk no 21 jullu 2020 mak foin aprova iha Parlamentu Nasionál.

“Atualmente   veta no haruka fila mai Parlamentu Nasionál no parlamentu atu halo saida, ne’e iha dalan-rua katak hadi’a lei ne’e ou halo votu konfirmasaun. Tuir ha’u-nia hanoin sei liuhosi dalan votu konfirmasaun hodi haruka fila-fali ba Repúblika,“ dehan Prezidente Komisaun B ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here