DILI, 12 outubru 2020 (TATOLI)—VIII Governu Konstitusionál lideradu Primeiru-Minstru, Taur Matan Ruak, sei aprezenta proposta Orsamentu Jerál Estadu (OJE) 2021 nian iha 15 outubru 2020.
Reprezentante Governu nian atuál Ministru Asuntu Parlamentár no Komunikasaun Sosiál (MAPKOMS), Francisco Jerónimo, ohin, partisipa reuniaun líder bankada parlamentár hodi informa kona-ba tempu ne’ebé Governu atu aprezenta proposta OJE ba PN.
“Iha loron 15 outubru 2020 Governu tenke lori fali proposta Orsamentu Jerál Estadu 2021 mai Parlamentu Nasionál. Governu garante orsamentu 2021 ne’e tenke lori mai, ne’e ajenda ne’ebé mak tau ona,” Ministru Asuntu Parlamentár no Komunikasaun Sosiál (MAPKOMS), Francisco Jerónimo, informa ba jornalista sira hafoin partisipa iha konvokatória líder bankada parlamentár iha sala konferénsia Parlamentu Nasionál, segunda ne’e.
Iha loron 30 setembru 2020 liubá, Governu liuhosi desizaun koletiva Konsellu Ministru (KM) halo aprovasaun prelimináriu ba tetu no dezagregadu OJE 2021 ho montante biliaun $1,895.
Dokumentasaun orsamentál sira-ne’ebé Governu sei aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).
Entretantu Sekretária Meza Parlamentu Nasionál, Deputada Lídia Norberta dos Santos Martins, hateten iha reuniaun líder bankada ohin ne’e parte Governu nian garante sei aprezenta proposta-lei OJE 2020 iha 15 outubru 2020.
Jornalista: Evaristo Soares Martins
Editor: Cancio Ximenes
