Xefe Bankada FRETILIN, Francisco Miranda Branco. Imajen Tatoli/Egas Cristovão

DILI, 10 outubru 2020 (TATOLI)—Bankada Frente Revolusionária Timor-Leste Independente (FRETILIN) iha uma fukun Parlamentu Nasionál, otimista medida rekuperasaun ekonómika ne’ebé introdús hosi VIII Governu Konstitusionál sei benefísia povu.

“Orsamentu Jerál Estadu 2020 aloka ba medida rekuperasaun ekonómika kurtu prazu millaun $113, ami fiar sei sirkula tomak iha ita-nia rai laran, sei fó benefísiu direta ba ita-nia povu, sei fó benefísiu direta ba ita-nia agrikultór sira, ita-nia toos na’in sira, ita-nia komersiante sira. Ami fiar Governu sei implementa ho di’ak programa ida-ne’e,” Xefe Bankada FRETILIN, Deputadu Francisco Miranda Branco, informa liuhosi plenária Parlamentu Nasionál, kinta ne’e.

Bankada FRETILIN konsidera medida ida-ne’e hatudu VIII Governu nia kompromisu ba dezenvolvimentu setór agríkola no setór peska ne’ebé importante tebes ba diversifikasaun ekonomia.

Bankada FRETILIN husu ho respeitu ba Primeiru-Ministru atu tau atensaun boot ba setór agríkola no setór peska iha tinan sira ne’ebé sei mai, liuhosi alokasaun orsamentu no atribuisaun kompeténsia nesesária ba dezenvolve setór rua ne’e.

Husu mós ba Ministériu Agrikultura no Peska atu intensifika liña koordenasaun traballu, entre agrikultura ho peska, ho ministériu no instituisaun sira seluk ne’ebé relevante, nune’e 2021 bele investe liután iha setór rua ne’e, ho objetivu médiu no longu prazu, Timor-Leste bele hetan soberania alimentár.

Iha setór saúde, bankada FRETILIN kongratula no enkoraja nafatin profisionál sira-nia esforsu-aan no vijilante liután, iha prevensaun no kombate hasoru virus Covid-19.

Tanba ne’e Bankada FRETILIN husu atu iha liña koordenasaun di’ak ho ministériu no instituisaun relevante sira seluk, no fó mós atensaun boot ba stoke aimoruk atu labele falta iha Ospitál Nasionál, ospital referál sira, klínika no postu saúde sira, hodi fó asisténsia povu.

“Iha setór edukasaun, ami hanoin presiza hadi’a duni infraestrutura maibé elementu importante tebes mak investe ba kualidade rekursu umanu iha ita-nia rai. Enkoraja ita-nia profesór sira hodi eleva nafatin kapasidade, fó-bolsa ka formasaun kontínua atu profesór sira bele hasa’e koñesimentu ba siénsia no pedagojia, atu-bele halo formasaun ho rekursu umanu di’ak liután ba ita-nia rai,” nia dehan.

Nune’e mós, tenke iha livru barak ba eskola ida-idak, liuliu iha área remota hodi intensifika estudante sira hatoman-aan ho leitura hahú hosi idade nurak.

Iha setór infraestrutura, bankada FRETILIN hanoin katak presiza iha liña kooodenasaun di’ak liután entre transporte no telekomunikasaun, eletrisidade ho bee-moos no saneamentu, obra públika ho ADN, hamutuk ho Planu no Ordenamentu nune’e povu bele asesu ba estrada, bee-moos no eletrisidade, tuir planu no ordenamentu ida di’ak ho respeitu ba ambiente.

FRETILIN apoia VIII Governu ninia polítika ba dijitalizasaun ne’ebé sei hadi’a administrasaun públika no loke asesu internet di’ak no lais liu ba sidadaun hotu-hotu, liuliu estudante sira iha área remota no iha Timor-Leste laran tomak.

“Ho investimentu ba fibra óptika hosi kosta-súl. Maibé ami mós rekomenda ba Primeiru-Ministru, karik bele halo revizaun ba investimentu ne’e rasik ho ninia montante, tuir prinsípiu boa governasaun. Iha setór petróleu, ami insentiva empreza públika Timor Gap ho nia jerénsia foun atu pro-ativu liu, hasa’e produtividade nune’e jere reseita ba Estadu. Setór privadu nu’udar Governu nia parseiru, tenke hetan tratamentu ida dignu ho baze iha regra,” nia hateten.

Bankada FRETILIN louva Primeiru-Ministru Taur Matan Ruak nia prinsípiu ne’ebé tau aas transparénsia no boa governasaun ne’ebé ezekusaun orsamentu foka liu ba kualidade la’ós ba persentajen.

Governasaun ne’ebé iha kumprimentu ba lei no konstituisaun, iha respeitu ba separasaun podér entre órgaun soberania sira tanba ida-ne’e maka hetan apresiasaun hosi Organizasaun ba  Kooperação no Dezenvolvimento Ekonómiku (OCDE-sigla portugés) hodi konsidera Timor-Leste sai hosi nasaun frájil.

Bankada FRETILIN elojia no fó votu susesu ba Xefe VIII Governu Konstitusionál ho nia elenku governativu, ne’ebé foin mak remata loron 100 governasaun, loron 100 de’it iha governasaun, maibé hatudu ona diferénsa barak, liuliu iha proposta OJE 2020.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here