DILI, 09 outubru 2020 (TATOLI)—Governu liuhosi reuniaun Konsellu Ministru (KM) sesta ne’e, aprova projetu dekretu-lei ne’ebé aprezenta hosi Vise Primeiru-Ministru no Ministru Planu no Ordenamentu, José Maria dos Reis, ne’ebé estabelese estatutu foun ba Ajénsia Dezenvolvimentu Nasionál (ADN) nian.
Ministru Prezidénsia Konsellu Ministru, Fidelis Manuel Leite Mahalhães, informa estatutu foun ne’e hakarak atualiza no revitaliza ADN hodi mantein objetivu no misaun hanesan, maibé re-estrutura ajénsia ne’e ho adaptasaun estrutura interna hodi hatán ba dezafíu sira ne’ebé koloka ho di’ak no efikáz liu.
“Nune’e ita prosede transformasaun ADN ba institutu públiku ho personalidade jurídika no klarifikasaun ba ninia atribuisaun hodi rezolve kestaun kona-ba pozisaun funsaun sira no aumenta atribuisaun ne’ebé temi iha estudu no dezenvolvimentu, inklui kapasitasaun profisionál ba tékniku sira iha setór área enjeñaria, arkitetura no projetu sira,” relata Ministru Fidelis hafoin ramata reuniaun ezekutivu iha Palásiu Governu.
Mudansa ne’e sei akontese mós ba kargu diresaun sira no revista iha estrutura serbisu sira.
Kriasaun ADN bazeia ba dekretu-lei 11/2011 iha tempu IV Governu Konstitusionál, ne’ebé iha kompeténsia atu avalia ho forma rigoroza, ba projetu kapitál dezenvolvimentu ne’ebé bazeia ba análize kustu benefísiu no monitoriza implementasaun no ezekusaun projetu liuhosi sistema sertifikasaun kualidade.
Nune’e mós, halo rasionalizasaun rekursu finanseiru ne’ebé disponível ba dezenvolvimentu nasionál no atividade ekonómika iha nível nasionál no lokál.
Ajénsia ne’e halo serbisu integradu iha administrasaun direta Estadu, ho estrutura orgánika flexibel atu fasilita hetan obra ne’ebé efikásia no seguru.
Aleinde ne’e, halo kontratasaun ba projetu kapitál dezenvolvimentu no jestaun akompañamentu projetu integradu iha programa dezenvolvimentu distritál no lokál, inklui kontrolu direitu ba kustu projetu.
Jornalista : Antónia Gusmão
Editora: Julia Chatarina
