Ekipa konjunta kompostu hosi CAC, PDHJ no CFP halo intervensaun direta ba prosesu rekrutamentu traballadór Timor-oan ba SWP Australia. Imajen/CAC

DILI, 09 outubru 2020 (TATOLI)- Deskonfia irregularidade no la tuir padraun no mekanizmu Sekretaria Estadu Formasaun Profisionál no Empregu (SEFOPE) nian iha prosesu teste ba kandidatura traballadór Seasonal Worker Program (SWP) atu ba servisu iha Australia, kinta (08/10), ekipa konjunta kompostu hosi  Komisaun Anti-Korrupsaun (CAC), Komisaun Funsaun Públika (CFP) no Provedoria Direitu Umanu no Justisa (PDHJ) halo  kedas intervensaun direita.

Notísia Relevante : SEFOPE Sei Hadi’ak Selesaun ba Kandidatu Traballadór SWP

Intervensaun ekipa konjunta nian ne’e através hala’o inspesaun urjente ne’ebé lidera direita hosi Komisáriu Adjuntu ba Asuntu Prevensaun no Sensibilizasaun CAC, Luis de Oliveira Sampaio, Komisáriu  CFP, António Freitas no Provedór Adjuntu PDHJ, José Telo.

Ekipa konjunta kompostu hosi CAC, PDHJ no CFP halo intervensaun direta ba prosesu rekrutamentu traballadór Timor-oan ba SWP Australia. Imajen/CAC

Ekipa konjunta hahú inspesaun surpreza iha fatin teste fíziku ba kandidatu traballadór ba Australia nian iha Sentru Formasaun Polísia, Comoro, no kontinua ba iha Sentru Formasaun SENAI, Becora, Dili.

“Intervensaun no inspesaun surpreza ne’e lider instituisaun Estadu halo hafoin ekipa CAC hala’o monitorizasaun direta iha terrenu no revela deskobrimentu lubuk ida ne’ebé implementasaun rekrutamentu no teste ba kandidatu sira la tuir padraun no mekanizmu SEPFOPE nian ne’ebé estabelese tiha ona,” haktuir nota komunikadu  imprensa hosi ekipa konjunta Agência Tatoli asesu, ohin.

Nota imprensa ne’e relata katak deskobrimentu fatal no nakonu ho konflitu interese  ne’ebé Sekretáriu Estadu SEFOPE, Alarico do Rosario halo iha prosesu rekrutamentu no teste iha SWP ne’e mak envolve asesór no apontamentu polítika  sira iha ninian gabinete hodi ba halo teste ba kandidatu traballadór sira iha terrenu.

Hafoin CAC halo intervensaun iha prosesu rekrutamentu ba kandidatu traballadór hamutuk na’in-6,000 ne’ebé sei haruka ba iha Australia ne’e envolve de’it staff permanente SEFOPE hodi promove transparente no kontabilidade iha prosesu rekrutamentu ne’e.

 Iha deskobrimentu  ba  akompañamentu iha prosesu teste kandidatu SWP ne’e ekipa ezaminadór sira iha inísiu la utiliza identidade hanesan ID card no kamizola/farda, nune’e fó oportunidade ba funsionáriu SEFOPE seluk ne’ebé maka la’ós ekipa ezaminadór  atu involve iha teste laran.

Ekipa konjunta mós nota katak, kualkér  funsionáriu  SEFOPE livre atu tama iha area teste tanba laiha regra, kada ezaminadór iha podér atu deside pasa ka lae, tanba ne’e maka akontese kandidatu balun maske bomba rai la tuir padraun manual nian, maibé ezaminadór fó pasa nafatin no  iha parte seluk ezaminadór seluk mós aplika estandarte/padraun ne’ebé  rigorozu ba sira seluk.

Ekipa ezaminadór  ne’ebé hanesan iha parte ezersísiu teste bomba rai,  ne’ebé la efisiénsia no iha indikasaun halimar valor hodi fó ba kandidatu sira ne’ebé maka ezaminadór gosta.

Tempu  ba teste halai iha oras meudia ka depoizde oras meiudia rezultadu  kandidatu barak maka la pasa tanba la aguenta ho rai manas.

Ekipa konjunta mós nota ekipa ezaminadór SEFOPE sira simu orientasaun hosi Diretór Filomeno katak dokumentu sira hosi kandidatu sira ne’ebé pasa ka la pasa iha selesaun agora ne’e sei rai hamutuk no lori hotu SEFOPE mak halo entry foun;

Antes ne’e prosesu entry data halo kedas iha fatin selesaun, maibé depois sira halo mudansa atu ba entre fali dadus/data iha edifísiu  kona-ba mudansa ne’e CAC intervein kedas no agora prosesu entry ne’e hala’o fali ona hanesan inísiu;

Ekipa CAC simu mós informasaun hosi ezaminadór sira katak  asesór sira mak entry data; dokumentu relevante sira hosi kandidatu sira hotu entrega ba asesór sira.

Atualmente dadus selesaun kandidatu sira hosi munisípiu sira hamutuk iha 11,000-resin no kandidatu sira agora halo hela teste ne’e, hamutuk ema 13.000-resin no  sei iha tan teste ba reklamante sira ne’ebé naran la sai hamutuk 3,000.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here