Vise Primeiru-Ministru no Ministru Planu no Ordenamentu, José Maria dos Reis. Imajen Tatoli/Egas Cristovão

DILI, 09 outubru 2020 (TATOLI)—VIII Governu Konstitusionál prevee ona orsamentu ho totál millaun $331 ne’ebé aloka iha fundu infraestrutura no kapitál dezenvolvimentu hodi finansia projetu infraestrutura ne’ebé sei implementa iha tinan 2021.

Vise Primeiru-Ministru no Ministru Planu no Ordenamentu, José Maria dos Reis, hateten Governu define ona prioridade ba projetu infraestrutura ne’ebé atu halo iha tinan oin.

Ministru José Maria hamutuk ho Primeiru-Ministru, Taur Matan Ruak no Ministru Obra Públika, Salvador Eugênio Soares dos Reis Pires halo ajustamentu ba planu.

“Segunda agora liuhosi reuniaun Konsellu Ministru sei aprova tetu Orsamentu Jerál Estadu (OJE) 2021, tanba ne’e maka ohin ami halo reuniaun hodi ajusta fundu infraestrutura no kapitál dezenvolvimentu iha orsamentu. Ami ajusta projetu balun ne’ebé sai prioridade iha tinan oin,” relata governante ne’e hafoin ramata reuniaun iha Palásiu Governu, sesta ne’e.

Tuir Ministru, projetu prioridade iha tinan oin maka bee-moos, estrada, infaestrutura no sira seluk ne’ebé mak bele influénsia ba públika

Reuniaun ne’ebé prezide hosi Xefe Governu envolve mós Diretór Ajénsia Dezenvolvimentu Nasionál (ADN), Renato Mariano Monteiro, Diretór SGP (Secretáriado Grandes Preojectos), Assessor Jurídiku no Assessor sira hosi Ministériu Planu no Ordenamentu (MPO), delegasaun MOP, Koordenadora Unidade Planeiamentu Monitorizasaun no Avaliasaun (UPMA), Brígida Soares, Diretór Jerál ba Tezouro, Diretór Jerál ba Planu no Diretór Jerál ba Komisaun Nasionál ba Aprovazionamentu (CNA, sigla portugués).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here