El-Matador Boxing hanesan klube boxing hola inisiativa realiza eventu boxing “Fight Night” ne’ebé sei hala’o iha Dili, 10 outubru 2020 . Imajen Tatoli/Hortencio Sanchez

DILI, 09 outubru 2020 (TATOLI) – El-Matador Boxing hanesan klube boxing ida lokaliza iha kapitál Dili hola inisiativa realiza eventu boxing “Fight Night” ne’ebé sei hala’o iha sábadu kalan ne’e.

Atividade sei hala’o iha resintu Sekretáriu Estadu Juventude no Desportu (SEJD), Lecidere, Dili, hodi promove talentu boksista Timor-oan sira-nian no prepara aan ba futuru.

“Eventu ida ne’e hanesan parte ida hodi promove talentu boksista sira-nian, nune’e bele iha esperiénsia di’ak liután hodi prepara ba futuru boksista Timor–Leste nian,” hateten Prezidente Komisaun Organizadór Juvenál Diaz, ohin, liuhosi konferénsia imprensa ne’ebé hala’o iha resintu SEJD.

Nia hatutan, eventu ne’e hanesan mós parte ida hodi komemora primeiru aniversáriu klube El-Matador nian.

Eventu ne’e sei partisipa hosi atleta hamutuk na’in-34, ne’ebé mai hosi  klube sira mak hanesan, El-Matador, Laulara Boxing, Benfica Boxing, Lorico Boxing, Bidau Masaur, Casa Grande, Cavalho, Oriental, Manumata, Thomas Americo no iha mós Muatai.

Atividade ne’e hetan mós apoiu hosi patrosinadór hanesan, Caltex, Morena, Timor Telecom, Amizade, Bidau Masaur, Limos, J5pro, SEJD, Federasaun Boxing Timor–Leste (FBTL), Muatai, Casa Grande, komunidade Klam no kolaborasaun barak hosi voluntáriu balu hodi halo susesu ba eventu refere.

“Eventu ne’e ami sei hala’o kalan ida de’it tanba  ami difikuldade tebes ba finanseiru. Eventu ida aban mós ami sei la konsidera hanesan eventu ikus liu, maibé ho objetivu atu  fanun ema hotu atu kria tan eventu barak liután iha futuru. Ba manán na’in sira ami sei la hanaran prémiu, maibé hanesan apresiasaun de’it, maibé iha buat balu ami sei fó maibé ami la hanaran prémiu,” Juvenál Diaz esplika.

Orsamentu ba atividade ne’e hosi El-Matador rasik ho montante $2,700,00. El-Matador Boxing nu’udar klube Bokse ne’ebé eziste iha Timor-Leste hahú iha 2019 ho vizaun mak atu promove boksista Timor-oan sira hodi sai atleta ne’ebé foti bokse hanesan sira-nia karreira servisu no la’ós sai de’it desportu ida tuir vizaun El-Matador nian katak “dignifika bokse nu’udar karreira no profisaun ida ba boksista Timor-oan sira.”

Iha tinan 2019, Boksista La’o-rai lubuk ida hosi Lautem ne’ebé hamahon-aan iha klube sira iha Dili tenta atu harii klube ida iha Dili, bainhira sira haree katak Boxing iha Timor sai hanesan de’it fatin atu Halimar Desportu, maibé la lori sai hanesan profisaun ida. Ho ida-ne’e, iha tinan ne’e duni, diskusaun atu hamosu desizaun ida atu estabelese El-Matador Boxing.

El-Matador, iha lian Tetun mak Oho-Na’in, atu luta hodi oho saida mak ladi’ak ba Boxing no impedimentu hirak ne’ebé halo Boxing la la’o bá oin ho hanoin, kriatividade no profisionalizmu.

Durante ezisténsia tinan-ida, El-Matador klube halo atividade sira hanesan, fó treinu no formasaun desportu bokse ba Timor-oan besik ema na’in-50, no atu lori sira ba Kampeonatu Nasionál.

Klube iha planu ba oin atu halo nafatin atividade ne’ebé mak iha ona no kapasita boksista sira hodi bele ba oin nafatin. Kbiit natoon ne’ebé mak klube iha sei presiza nafatin atu buka dalan hodi sustenta nafatin ba tempu naruk nian no fó rezultadu di’ak iha nivel nasionál. Nune’e mosu idea atu halo konseitu ida hodi organiza, mobiliza, no inisia eventu bokse hahú mosu liuhusi diskusaun iha dalan-dalan no fatin-fatin. Ikus mai mosu hanoin ida atu halo eventu dahuluk El-Matador Boxing  FIGHT NIGHT  iha 2020.

Eventu ne’e sai hanesan fundraising atu bele hetan netik forsa di’ak ruma ba eventu sira tuir mai no ba futuru boksista sira ne’ebé mak hamahon-aan iha klube ne’e.

El-Matador Club hili loron 10 outubru 2020, hanesan mós ho loron moris klube nian, nu’udar loron ba realizasaun 1st El-Matador Boxing FIGHT NIGHT 2020 no hanesan mós aniversáriu ba ezisténsia tinan ida nian.

Ho kapasidade ne’ebé sei nurak no limitadu, El-Matador Boxing husu tulun, apoiu no voluntarizmu ba ema hotu-hotu hodi lori prosesu tomak ba vizaun ida di’ak ba ohin, aban no futuru.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here