Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 08 outubru 2020 (TATOLI)—Primeiru-Ministru (PM), Taur Matan Ruak, apresia deputadu sira ne’ebé partisipa másimu no ativu iha diskusaun proposta Orsamentu Jerál Estadu (OJE) 2020, hahú hosi diskusaun iha komisaun to’o votasaun iha faze finál globál.

Parlamentu Nasionál (PN) aprova proposta orsamentu tinan fiskál 2020 iha finál globál ho rezultadu votasaun a-favór 43, kontra 21 no abstensaun 1.

“Ha’u kontente loos tanba finalmente Orsamentu Jerál Estadu 2020 bele pasa. Tanba ne’e ha’u hakarak lori VIII Governu nia naran agradese Parlamentu Nasionál, espesiál ba bankada Governu nian,” tenik PM Taur iha Parlamentu, kinta ne’e.

Notísia Relevante: KM aprova tetu OJE 2020 biliaun $1,497, aumentu millaun $1,49

PN aprova ona OJE 2020 iha finál globál

Xefe ezekutivu agradese kontribuisaun bankada opozisaun ninia opiniaun no hanoin krítiku ne’ebé bele ajuda Governu iha ezekusaun programa.

“Lori VIII Governu nia naran, fó saudasaun espesiál ba oposizaun ne’ebé durante ne’e fó kontribuisaun di’ak loos, ami rejista sira-nia preokupasaun barak no ami espera katak tempu ba tempu bele kontinua hadi’a nafatin no kapasita Governu ho prestasaun servisu di’ak ba sidadaun sira,” tenik PM Taur.

Tuir Xefe Governu, programa prioritáriu Governu iha tinan ne’e maka planu rekuperasaun ekonómiku ba kurtu prazu.

Ba kualidade orsamentu ne’ebé sai preokupasaun deputadu sira, PM dehan Governu sei halo esforsu atu kontinua hadi’a hodi aprezenta orsamentu ida estruturalmente ho kontiúdu di’ak tuir lei no mós tuir rejimentu PN.

OJE 2020 ho montante biliaun $1,497, fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4. 

Ho aprovasaun ne’e hakotu rejime duodesimál ne’ebé Governu hahú funsiona iha janeiru to’o outubru 2020 no orsamentu normál sei efetivu iha novembru no dezembru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here