Diretora Organizasaun Plan Internasional Timor-Leste, Dillyana Daten Ximenes. Imajen TATOLI/osoria Marques.

DILI, 08 outubru 2020 (TATOLI)–Organizasaun Plan Internasionál komemora loron internasional ba labarik feto ho tema “Freedom Online” objetivu atu halakon asédiu no abuzu seksuál ba labarik feto no feto klosan sira iha mídia sosiál.

Diretora Organizasaun Plan Internasional Timor-Leste, Dillyana Daten Ximenes, hateten durante Plan Internasional hala’o peskiza mundiál ba nasaun 22 iha mundu hatudu katak labarik feto sira hamutuk na’in 14.000 maka hetan ona asédiu no abuzu seksuál iha mídia sosiál.

“Ami-nia peskiza mundiál ba nasaun 22, hatudu katak labarik hamutuk 14.000 no hosi ne’e 58% maka hetan ona abuzu ka violénsia bainhira sira uza mídia online hanesan, facebook, tiktok, twitter no instagram. Tanba ne’e iha loron internasional ba labarik feto sira-ne’e ita foti tema ‘freedom online’ ho objetivu atu labarik feto sira presiza livre hosi asédiu no abuzu iha mídia sosiál,” dehan Dillyana Daten Ximenes ba jornalista sira, iha Otél Novu Turizmu, Lecidere, Dili, kinta ne’e.

Nia hatutan, maibé hosi peskiza mundiál ne’ebé Plan Internasional halo, Timor-Leste seidauk iha dadus kompletu ba labarik feto sira ne’ebé maka sai vítima ba média sosiál maibé sira uza sira-nia servisu iha duni violénsia barak akontese tanba ne’e sira luta nafatin oinsá kria espasu ne’ebé seguru liubá labarik feto sira iha Timor-Leste.

“Ba labarik feto sira imi lalika tauk tanba imi la mesak. Plan Internasional hamutuk ho Embaixadora Plan Internasional Espoza Prezidente Repúblika Cidalia Nobre Mouzinho Guterres no mós parte Governu nafatin kontinua atu luta kria espasu ne’ebé seguru atu bele hapara violénsia forma hotu-hotu espesialmente iha mídia sosiál,” nia dehan.

Tanba ne’e, atu kombate violénsia oin-oin ne’ebé labarik feto sira durante ne’e hetan, Plan Internasional hili espoza Prezidente Repúblika, Cidalia Nobre Mouzinho Guterres, sai hanesan Embaixadora ba Plan Internasional atu hala’o  kampaña oinsá atu hakbesik-aan ba labarik feto sira atu hatene situasaun saida maka vítima sira hasoru.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here