Xefe reprezentantivu JICA iha TL, Goto Ko, kua fita ho simbolu entrega ekipamentu prevensaun COVID-19 ba Reitór UNTL, Francisco Miguel Martins. imajen/mídia JICA.

DILI, 08 outubru 2020 (TATOLI)-Ajénsia Internasionál Kooperasaun Japaun (JICA, sigla inglés), ohin, entrega ekipamentu prevensaun COVID-19 ba Fakuldade Enjinária Siénsia no Téknolojia (FECT), Universidade Nasionál Timor Lorosa’e (UNTL) hodi fasilita instituisaun públika ne’e hodi prevene transmisaun pandemia globál coronavirus iha Timor-Leste (TL).

Xefe Reprezentantivu JICA iha TL, Goto Ko, mak entrega materia prevensaun coronavirus ne’e ba Reitór UNTL, Francisco Miguel Martins, ho Dekanu FECT, Jerónimo Freitas, iha Kampus UNTL Hera.

Notísia Relevante :Japaun Hakarak Fó Bolsa Estudu ba Estudante UNTL To’o Na’in 200

Apoiu hirak ne’e maka fatin fase liman unidade tolu ho tanke bee moos tolu, máskara hena 3000, scanner thermometer unidade 10, sasán ijiene  10 hanesan sabaun fase liman 300, líkuidu fase liman 600, rinsu líkuidu masa 50,  kontetór dezifektante 20, bayclin masa 50, lixu fatin boot lima (5), kiik 50.

Aleinde ne’e, plástiku raut fo’er pakote 600, tissue hamoos liman kaixa 600 no tissue hariis fatin pakote 200.

Goto Ko, hateten apoia hirak ne’e partikularmente ba prevene COVID-19 maibé bele uza atu promove ambiente ida moos.

“Husu ba dosente no estudante sira hosi Departamentu ne’en mak hanesan, Enjiária, Mekánika, Sivíl, Eléktrika, Elektrónika, Informátika, Jeolojia  no Petróliu atu utiliza apoiu hirak ne’e iha imi-nia atividade lorloron nian,” Ezekutivu ne’e hateten.

Tulun husi JICA ne’e ho valór orsamentu hamutuk 14.000, nu’udar aktu solidaridade ida hodi suporta Timor-Leste para kontra hasoru COVID-19.

Iha fatin hanesan Reitór UNTL, Francisco Miguel Martins, agradese ba apoiu ne’ebé oferese ona husi JICA.

“Husu ba dosente,  estudante no tékniku administrativu tomak ne’ebé mak hamahan aan iha FECH  tenke utiliza ho  didi’ak fasilidade sira ne’ebé mak JICA suporta”, ezekutivu dehan.

Jornalista:Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here