Polísia Munisípiu Dili halo apreensaun ba taxi no mikrolete no motór barak komete iha infrasaun. Imajen Tatoli/Eugénio Pereira

DILI, 06 outubru 2020 (TATOLI)- Komandu Polísia Munisípiu Dili liuhosi Seksaun Unidade Tránzitu Rodoviáriu, ohin, halo operasaun auto stop iha área estrada Sentru Konvensaun Dili (CCD) konsege identifika no halo apreensaun ba taxi hamutuk 42 no mikrolete haat ne’ebé komete irregularidade tanba laiha dokumentu, inklui motorista sira lori karreta la uza farda.

Operasaun emerjénsia ne’ebé hahú hosi tuku 07:00 to’o tuku 12:00 Otl, halo motorista barak lamenta no halo protesta maka’as, maibé ekipa PNTL kontinua sensibiliza nafatin regra no lei kódigu estrada tuir dekretu lei númeru 6/2003, loron 3 fulan Abríl.

Taksista, João Pinto dos Santos, rekoñese ninia taxi dokumentu mate ona no nia laiha farda tanba farda ba taksista sira-nian ida de’it no tenke hatais loron-loron to’o tempu tenke fase.

“Ami presiza fase mós farda ne’e, tanba ita uza loroloron to’o semana ne’e oinsá, se governu hakarak ami uza farda di’ak liu governu tenke ajuda suku fó ami, tanba ami halai karreta privadu atu hetan de’it osan mós arraska, oinsá maka ita atu suku fali farda,” nia lamenta.

Nia husu ba PNTL atu halo kontrolu másimu ba Bus no Angguna sira ne’ebé tula pasajeiru mai hosi munisípiu labele lori direita ba hatún iha pasajeiru sira-nia uma, maibé tenke hatún iha fatin estasionamentu ka terminál.

Motorista ne’e mós lamenta, tanba agora karreta tenke para iha PNTL no sira la iha osan atu selu multa iha banku.

Responde ba preokupasaun ne’e, Segundu Komandante PNTL Munisípiu Dili, Superintendente, Euclides Belo dehan, liu ona tinan 15 PNTL sosializa lei kódigu estrada tuir dekretu lei númeru 6/2003, loron 3 fulan Abríl, ba motorista sira iha kapitál Dili bainhira lori transporte privadu no estadu tenke kumpre lei.

Nia hatutan, ba motorista sira ne’ebé lori karreta, Taxi, Angguna, Bus no mikrolete ne’ebé halo operasaun iha kapitál Dili tenke hatudu ezemplu ba munisípiu seluk, lori transporte kumpre regra tránzitu nian.

“Transporte sira ne’e ita prende, komete infrasaun hanesan, surat karreta mate, la uza farda ne’e ita prende hotu, tanba Dili ne’e kapitál nasaun hotu- hotu tenke kumpre regra,” dehan Euclides.

Tuir observasaun Agência Tatoli nota, taxi, mikrolete, angguna inklui motór barak ne’ebé PNTL halo apreensaun para hotu iha Eskuadra PNTL, Caicoli, Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here