Imajen/RYLA TL.

DILI, 05 outubru 2020 (TATOLI)—Xefe Estadu Maior FALINTIL-Forsa Defeza Timor-Leste (F–FDTL), Majór Jenerál Lere Anan Timur, hateten juventude ne’ebé hakarak sai lideransa ne’ebé maka di’ak tenke matenek atu nune’e lalika buka buat ne’ebé maka fasil maibé tenke buka buat ne’ebé difisíl.

Notísia Relevane: Juventude iha interese sai lideransa di’ak tenke estuda

Nia hatutan, tanba kompara ho tempu uluk nian ema ida atu sai lideransa tenke ema ida-ne’ebé matenek iha hanoin no hahalok, atu nune’e soldadu ruma halo sala karik tenke hanorin sai soldadu ne’ebé mak di’ak.

“Ha’u nuudar Komandante Forsa Armada ida kuandu ha’u-nia soldadu ida halo  sala, ha’u  tenke duni sai nia ne’e buat fasil. Lae, hanesan profesór ida  nia alunu ida halo sala duni sai ne’e mós fasil. Maibé, eduka ema atu sai militár no alunu ne’ebé mak di’ak difisíl tebe-tebes. Tanba ne’e, sai hanesan lideransa ida lalika buka buat ne’ebé mak fasíl maibé tenke buka buat ne’ebé difisíl mak hodi fera ulun no matenek atu bele reolve problema sira-ne’e,” dehan Majór Jenerál Lere Aman Timur bainhira sai oradór iha semináriu Rotary Youth Leadership awards Timor Lorosa’e (RYLA), iha Salaun Unio Maloa Training Center Semináriu Ailok-Laran, Dili, segunda ne’e.

Lere esklarese, esperénsia iha tempu luta nian, nia sai lideransa hahú iha ai-laran hosi ne’ebá  nia komanda forsa dahuluk  sai membru Comité Centrál FRETILIN (CCF), hafoin tama sub-rejiaun  polítiku no Militár, ne’e mak hanesan organizasaun ida-ne’e mak nia sente. Tanba, nia dehan, sai lider ida ne’ebé matenek tenke sai hanesan lalenok no ezemplu ba ema hotu–hotu.

 “Lideransa ne’e ema balu estuda maka hetan konsetu lideransa ne’e maibé hanesan ha’u no ha’u-nia maluk sira seluk ne’e, ami nunka estuda lideransa ne’e. Ami-nia lideransa ne’e naturál. Tanba, ita moris mai ne’e ema ida-idak iha dalan atu sai lideransa. Maibé, ko’alia kona-ba lideransa ne’e oin-oin iha kuantidade no kualidade. Ita hare’e iha Timor, iha ema  barak maibé lideransa ne’e la hanesan,” nia haktuir.

Nia dehan, uluk iha ai laran, lideransa la barak no lideransa uitoan de’it maibé kualidade ne’e iha. Tempu agora, lideransa ne’e bele dehan lider ba kompañia, ONG, eskola, Governu no sira seluk tan maibé  lider ne’ebé iha susesu presiza halo asaun no buat ne’ebé  mak lideransa presiza halo.

Timor-Leste nu’udar nasaun ida ne’ebé maka joven liu iha mundu no ki’ak mós, nia dehan, maibé dehan atrazadu Timor-Leste la atrazadu ida. Tanba, tuir nia, povu orgullu nu’udar nasaun ida hatudu ba mundu katak la atrazadu no timoroan mós iha matenek tanba ne’e maka ohin loron sai nasaun ida.

“Ita sai nasaun ida tanba luta hosi ita-nia lideransa sira hanesan Xanana Gusmão, Jose Ramos Horta, Mari Alkatiri, Francisco Guterres ‘Lú-Olo”, Taur Matan Ruak no sira seluk tan. Lider hirak ne’e nia matenek no domin ba nasaun ida-ne’e mak ohin loron ita hetan ukun rasik-aan ida ne’e. Tanba ne’e, iha Timor lideransa barak maibé hanoin la hanesan diverjénsia idolojiku,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here