Eis Prezidente Repúblika, José Ramos Horta. Imajen Tatoli/Jogerjo Guterres

DILI, 05 outubru 2020 (TATOLI)–Laureadu Nobel da paz no Eis Prezidente Repúblika,  José Manuel Ramos Horta, husu ba foinsa’e sira atu hatene lideransa no sai lider ne’ebé mak di’ak tenke estuda didi’ak no buka  referénsia barak iha rai-laran hodi estuda Xanana Gusmão ninia lideransa no mós lider mundiál seluk hosi nasaun oin-oin.

“Ita hakarak hatene kona-ba lideransa ita tenke estuda barak no buka referénsia barak hosi nasaun oin-oin no mós iha ita-nia rai laran. Ezemplu, referénsia iha rai laran, foinsa’e sira estuda lideransa Maun Boot Xanana Gusmão nian tanba ha’u mós estuda hotu nia lideransa. Tanba ha’u hatene nia vizaaun no desizaun balu ne’ebé nia halo mak ohin loron ita hotu iha fatin ne’e,” dehan Laureadu Nobel da Paz, José Manuel Ramos Horta, bainhira halo abertura ba  programa Rotary Youth Leadersyp Awards Timor Lorosa’e (RYLA-TL) ne’ebé halo aniversáriu ba dala-11 ho tema “Lead to Change” iha fatin Union Maloa Training Center (Semináriu Ailok Laran), segunda ne’e.

Nia hatutan, joven sira presiza estuda tuir lideransa Xanana Gusmão nian tanba nia nu’udár lideransa ne’ebé iha vizaun, matenek no korajen ne’ebé iha halo desizaun ne’ebé loos iha momentu istória funu nian.

“Estuda di’ak ita-nia lideransa tanba Xanana lideransa ne’ebé ho vizaun matenek ho korajen halo desizaun ne’ebé loos iha momentu istória funu nian. Maun Xanana nia ezemplu ba ita hotu maka labele lakon Jenela Oportunidade. Katak, janela ida loke oportunidade mak ne’e, bainhira oportunidade ne’e mosu la kaer metin mak oportunidade ne’e lakon,” nia dehan.

Entretantu, Eis Prezidente Repúblika ne’e mós husu ba foinsa’e sira katak aleinde estuda lideransa Xanana Gusmão nia lideransa, estuda mós lideransa nasionál sira seluk hanesan Taur Matan Ruak, Lere Anan Timur, Lú-Olo, tanba lideransa hirak ne’e ida-idak ho ninia esperiénsia rasik.

Tanba ne’e, Ramos Horta husu ba juventude sira katak atu sai lideransa ne’ebé di’ak tenke estuda barak no labele sosa de’it diploma, tanba bainhira sosa de’it diploma la hatene buat ida no sei la hetan servisu iha tempu ruma.

“Husu ba imi tenke buka kursu siéntífiku  hanesan siénsia teknolójia, ekonómia, medisina, enfarmajen mekániku, IT, profisionál hanesan hatene hadia eletrisidade, kareta, kanalizasaun. Tanba bainhira buka servisu ema la presiza ita-nia diploma ne’ebé boot maibé ema haree ita-nia esperiénsia ne’ebé bele hetan servisu lalais,” nia esplika.

Jornalista: Osória Marques

Editór: Cancio Ximenes

1 KOMENTÁRIU

  1. Hau Hanoin Dr. Horta nia dekrasaun Furak tebes tamba bele fanun belun sira hotu bele aprende Lider diak sira nebe susesu iha nia lideransa, maibe Hau Sujere deit ba belun sira hotu keta haluha aprende mos lider sira seluk nebe lasuesu iha nia lideransa atu nune risku falhansu iha ita nia lideransa ho pursentu nebe mininu🙏😊

HAKEREK NO HATÁN

Please enter your comment!
Please enter your name here