Imajen Ilustrasaun/google

DILI, 05 outubru 2020 (TATOLI) – Komandu Polísia Munisipiu Aileu ho komunidade hetan mate isin bebé ida ne’ebé ema deskoñesidu soe ho kondisaun bebé ninia isin lolon sorin asu han tiha ona.

Kazu soe bebé inosente ne’e akontese iha Suku, Liquitura, Postu Administrativu Aileu Vila, Munisípiu Aileu, ne’ebé komunidade hetan iha sábadu dadeer (3/10/2020).

Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

Portavós Komandu Jerál PNTL, Superintendente Xefe, Arnaldo de Araújo dehan, parte Investigasaun Kriminál foti ona bebé ninia isin lolon lori ona ba Ospitál Nasionál Guido Valadares (HNGV) hodi halo autópsia.

Daudaun ne’e parte Seksaun Investigasaun Kriminál PNTL Aileu halo ona investigasaun ne’ebé deskonfia feto ida maka soe bebé ne’e.

“PNTL Aileu rejista mós kazu soe bebé ida iha Aileu ho kondisaun isin lolon balun asu han tiha ona.  Bebé ne’e ninia isin lolon lori ona mai ospitál. Ita nia polísia sira deskonfia alin feto ida maka soe, no sira sei buka tuir nafatin hela,” informa portavós PNTL, Arnaldo de Araújo, liuhosi konferénsia imprensa, ohin, iha Kuartél Jerál PNTL, Dili.

Iha parte seluk, PNTL Aileu mós rejista kazu asidente tráfegu ne’ebé rezulta vítima feto ida ho naran Olivia mate fatin.

Asidente ne’e akontese iha área Aiserimou, Edifísiu Terras Propriedade nia oin, no parte PNTL mós detein ona autór ne’ebé soke vítima hodi aprezenta ba Ministériu Públiku hala’o primeira interrogatóriu iha Tribunál Distritál Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here