Vise-Ministra Finansa, Sara Lobo Brites. Imajen Tatoli/Egas Cristovão

DILI, 03 outubru 2020 (TATOLI)-Vise Ministra Finansa, Sara Lobo Brites, hateten Governu liuhosi konsellu fundu COVID-19 ne’ebé lideradu hosi Ministériu Finansa (MF) konklui ona pagamentu suplementu remuneratóriu ba ekipa liña frente ne’ebé maka serbisu iha ámbitu Estadu Emerjénsia (EE) ligadu ho surtu globál.

“Reuniaun semana ne’e nia laran konfirma katak pagamentu ba suplementu remuneratóriu  bele dehan kobre hotu ona,” relata Vise Ministra Sara iha ámbitu diskusaun ba pedidu estensaun deklarasaun EE daneen iha sala plenáriu Parlamentu Nasionál (PN), sábadu ne’e.

Instituisaun ne’ebé tuir lei bele sai benefisiáriu ba programa Governu ne’e no simu ona pagamentu maka Polísia Nasionál Timor-Leste (PNTL) inklui FALINTIL-Forsa Defeza Timor-Leste (F-FDTL), profisionál saúde, funsionáriu portu Dili no aeroportu, tékniku Eletricidade de Timor-Leste (EDTL), Diresaun Nasionál Água no Saneamentu (DNAS), pesoál limpeza, ajente administrasaun públika ne’ebé serbisu iha Sala Situasaun Sentru Integradu Jestaun Krize (CIGC, sigla portugés).

“Pagamentu dahuluk ba PNTL no F-FDTL, maibé deputadu sira koloka asuntu kona-ba membru ne’ebé seidauk simu, karik Governu iha mekanizmu, maibé ida-ne’e kabe ba instituisaun rasik maka reklama no submete ba konsellu fundu atu rezolve. To’o agora konsellu seidauk simu reklamasaun ruma hosi instituisaun rua ne’e no sira simu hotu ona sira-nia dereitu tuir lei haruka,” Ministra akresenta.

Pagamentu ba liña frente kompostu hosi PNTL $3.614.400 ba ema na’in-4.016, protesaun sivíl $422.325 ba ema 2.005, F-FDTL $1.805.400 ba ema 5.818, no profisionál saúde $3.894.590, nune’e totál pagamentu hamutuk $9.736.715 ba ema 13.845.

Governante ne’e refere ba profisionál saúde balun ne’ebé simu ona maibé pagamentu la tuir oras no loron serbisu.

“Entaun mosu reklamasaun, loos duni konsellu fundu foin simu tan pedidu adisionál ida hosi Ministériu Saúde ba ema 155 hodi hetan pagamentu, prosesu la’o hela,” nia informa.

Membru ezekutivu ne’e informa, seluk ne’ebé sei iha prosesu nia laran maka proposta hosi Sekretaria Estadu Komunikasaun Sosiál (SEKOMS) ba jornalista sira, tanba ne’e Ministériu Asuntu Parlamentár no Komunikasaun Sosiál (MAPKOMS) foin estabelese kuadramentu legál no foin hetan promulgasaun hosi Prezidente Repúblika.

“Agora iha hela prosesu nia laran atu halo pagamentu ba jornalista sira,” nia katak.

Enkuantu, ba pesoál Aeroportu no Navegasaun Aérea Timor-Leste (ANATL) maski halo atendimentu ba ema tama no sai hosi pontu entrada, maibé tanba estatutu instituisaun ne’e define katak empreza públika maka laiha direitu atu sai benefisiáriu ba programa ne’e.

“Atribuisaun ne’ebé maka Konsellu Ministru aprova define ba serbisu administrasaun públika, maibé ANATL ne’e empreza públika ne’ebé laiha kobertura hosi atribuisaun ne’ebé mak fó,” nia esplika.

Fontes finansiamentu ba fundu COVID-19 kompostu hosi transferénsia estraordinária fundu petrolíferu ba dahuluk ho montante millaun $150 no ba daruak millaun $69,5 inklui apoiu finanseiru hosi Organizasaun Internasionál Traballu (OIT) ho montante $748.000.

Alokasaun fundu ba prevensaun no metigasaun COVID-19 millaun $149,500, doasaun hosi OIT $748.000, no medida apoi ekonómiku no protesaun sosiál millaun $70, ho totál orsamentu millaun $220,248.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here