Prezidente EleituEvangelisto Gantry dos Santos Meilana, hasai foto hamutuk ho Eis Sekretariu Estadu Juventude no Desportu, Nelio Isaak Sarmento, Prezidente Konsellu Imprensa (CI), Virgílio da Silva Guterres no seluk tan.Imajen/Hortencio Sanchez.

DILI, 03 outobru 2020 (TATOLI)-Kongresu dahuluk Asosiasaun Jornalista Desportu Timor-Leste (AJORSTIL), iha sábadu ne’e, hili Evangelisto Gantry dos Santos Meilana, nu’udar Prezidente ba organizasaun ne’e ho mandatu tinan haat 2020-2024.

Kongresu ne’e ho tema ” Hamutuk profesionaliza Servisu Jornalista Desportu”.

Durante kongresu ne’e, kongresista sira hili  Prezidente eleitu ho votus afavór sia, kontra 0, no abstensaun 0. Julito Ximenes hanesan Vise Prezidente, no Sekretáriu maka Augosto Turky.

Hafoin eleitu, Gantry,  hateten servisu dahuluk maka sei lori estatutu organizasaun nian ba rejistu iha servisu notariadu Ministériu Justisa hodi hetan legalidade.

“Iha ha’u nia mandatu sei esforsu hodi lori ita-nia estatutu ba rejistu iha notariadu, sei haree difikuldade jornalista desportu nian hotu no servisu seluk tan atu habot liután asosiasaun ne’e,” dehan nia iha salaun Xanana Sport Centre Bairro Formosa.

Aleinde ne’e sei buka atu kria ligasaun ho Organizasaun Internasionál sira ne’ebé halo atividade iha área desportu nian.

“Iha fulan hira ba kotuk AJORSTIL halo ona kontaktu ho Asosiasaun Jornalista Desportu Azia (AIPS). Komunikasaun ne’e AJORSTIL hala’o direita ho Sekretáriu Jerál AIPS, Amjad Azzis kona-ba ejisténsia AJORSTIL nian,” nia hateten.

Entretantu, AJORSTIL harii iha 22 fulan-jullu 2016 husi inisiativa jornalista desportu hamutuk ema na’in 11 maka Evangelisto Gantry, Augosto Sarmento, Julito Ximenes, Cristovão Silva, Hortencio Sanchez, Aquino Campos, Victór Madeira, Abílio Gonçalves, Triponio Marques, Natalino Belo no Victór Lopes.

Entretantu, iha kongresu dahuluk ne’e, halo aprovasaun ba rejimentu, estatutu asosiasaun nian no mós simu membru foun purvolta ema na’in 10-resin.

Patrisinadór ba kongresu ne’e maka Pertamina, VIP TV, Desportu, XYZ no Mahanaim Jenifer Fundation.

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here