Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze jeneralidade ba loron daruak, iha sala plenáriu PN, sesta (02/10). Imajen Tatoli/Egas Cristovão

DILI, 02 outubru 2020 (TATOLI)-Iha diskusaun faze jeneralidade ba Proposta Orsamentu Jerál Estadu (OJE) 2020 entre Governu no Parlamentu Nasionál (PN), Primeiru-Ministru (PM), Taur Matan Ruak, deklara prefere ezekusaun orsamentu ho kualidade.

“Ha’u la preokupa ho nível ezekusaun orsamentál maibé preokupa ho membru Governu no ha’u-nia funsionáriu sira gasta osan ne’e ho di’ak, entre gastar bem ho gastar mal ha’u hili gastar bem, ne’ebé neneik maibé di’ak do que lais maibé arbiru de’it,” hateten Xefe Governu ne’e iha diskusaun ba loron daruak iha sala plenáriu PN, sesta ne’e.

Nia haktuir, bainhira sai Prezidente Repúblika sempre halo diskursu ne’ebé fó hanoin ba Governu atu labele haree osan hira maka gasta oan maibé presiza haree saida maka halo ona.

Xefe Ezekutivu rekoñese, durante ne’e reprezentante povu sira sempre kestiona kona-ba kapasidade ezekusaun orsamentu Governu, maibé nafatin matein desizaun ezekuta ho kualidade.

“Ha’u-nia mandatu bele hurlele ha’u katak inkapasidade tanba ezekusaun orsamentál la la’o, ita lian la hanesan tanba ita filozofia la hanesan, ne’ebé ita iha dalan rua de’it, ha’u tuir ita bo’ot sira ka ita bo’ot sira tuir ha’u, ou entaun ita la’o ketak-ketak,” nia subliña.

PM dehan, fásil atu ezekuta osan tanba ema hotu hatene gasta, maibé gasta ba nesesidade loloos ne’e maka presiza halo ezersísiu.

“Agora gasta di’ak ne’e mak problema, daudaun ne’e kualkér karta ida ne’ebé dirije ba ha’u-nia gabinete akuza ema ruma, ha’u manda kedas karta ne’e ba Komisaun Antí-Korrupsaun (CAC, sigla portugés) atu halo inspesaun jerál tanba ha’u lakohi husik iha ha’u-nia gabinete,” nia informa.

Biban ne’e, nia husu entidade hotu buka dalan rezolve problema la’ós amenta problema.

“La’ós hatudu liman ba malu maibé presiza servbisu ekipa hodi rezolve problema hamutuk. Ha’u husu Parlamentu ajuda ami atu gasta osan di’ak, ne’e di’ak liu do que insiste kona-ba nível ezekusaun tanba ezekuta lais ne’e di’ak maibé to’o ikus Tribunál Konta tuir kedas ita,” PM fó hanoin.

Xefe Governu ko’alia kona-ba ezekusaun orsamentu 2020 hodi hatan ba preokupasaun Deputada bankada CNRT, Carmelita Caetano Moniz, kona-ba kapasidade ezekusaun ezekutivu.

Deputada bankada opozisaun ne’e refere ba Proposta OJE 2020 biliaun $1,497, foti liu Rendimentu Sustentável Estimadu (RSE) millaun $416,5 no iha fulan-tolu de’it halo ezekusaun maibé ezekusaun efetivu fulan-ida de’it tanba 15 outubru Governu sei hato’o hikas fali OJE 2021 ho karatér normál ba fulan-rua.

“Membru Governu sira loron kalan aprezenta iha Parlamentu no tékniku sira hotu tenke tuir, maibé ezekusaun orsamentu ne’e efetivu fulan-ida de’it, sera que Governu bele iha kapasidade atu ezekuta orsamentu ne’e? ha’u sente katak ita bele tanba ami nia slogan fian-an la’o ba oin. Maski nune’e ha’u iha dúvida boot,” Deputada ne’e kestiona.

Entretantu, Governu desde janeiru to’o agora rekorre ba Dotasaun Orsamentál Tempoáriu (DOT) hodi bele sustenta mákina Estadu tanba orsamentu 2020 la pasa.

Ezekusaun despeza ho forma duodedesimál no ezekusaun iha ámbitu surtu COVID-19 to’o 31 agostu 2020 atinje ona montante millaun $600,4  no sei iha balansu millaun $896,7 hosi totál tetu biliaun $1,497.

Hosi montante ezekusaun, kompostu hosi ezekusaun reál iha nível kategoria orsamentál hanesan saláriu no vensimentu millaun $123,6,  bens no servisu millaun $199,7, tranferénsia públika millaun $153,7, kapitál menór millaun $2,2, no kapitál dezenvolvimentu millaun $120,8.

Despeza OJE 2020 mai hosi millaun $973,9 hosi fundu petrolíferu, millaun $175 hosi reseita tributária, millaun $6,8 husi reseita própria, millaun $10,7 hosi doasaun, millaun $0,5 hosi jurus no millaun $214,2 hosi saldo tezoru, millaun $76 hosi saldo Rejiaun Adminsitrativu Espesiál Oé-cusse no Ambeno (RAEOA) no millaun $70 hosi empréstimu.

Orsamentu ba tinan ne’e inklui mós ho medida haat rekuperasaun ekonómika ba longu prazu ne’ebé implementa iha jullu to’o dezembru 2020 ho totál despeza millaun $113,4 (sei iha mudansa).

 Medida haat ne’e maka cesta bázika ba família sei implementa iha fulan novembru no dezembru ho totál kustu millaun $71,5, subsídiu retoma implementa iha fulan agostu to’o dezembru ho totál kustu millaun $35, despeza kontributiva implementa iha fulan jullu to’o dezembru ho totál kustu millaun $3,6, apoiu espesiál  ba traballadór informál ne’ebé sei implementa iha fulan outubru to’o dezembru ho totál kustu ba medida ne’e maka millaun $3,3.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here