Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál, kinta (01/10). Imajen Tatoli/Egas Cristovão

DILI, 01 outubru 2020 (TATOLI)—Bankada Partidu Demokrátiku (PD) iha uma Fukun Parlamentu Nasionál propoin konsensu nasionál iha prosesu dezenvolvimentu Greater Sunrise.

Membru Bankada PD, Deputadu Adriano do Nascimento, propoin ideia ne’e liuhosi debate OJE 2020 faze jeneralidade dahuluk.

Deputadu Adriano do Nascimnto, aprezenta ideia ne’e tanba hanoin ba futuru kona-ba reseita Estadu nian ne’ebé atu substitui reseita hosi posu Bayu Undan tanba reseita hosi posu refere menus daudaun ona.

“Ita-nia problema mak ne’e reseita hosi Bayu Undang menus daudaun ona depois prosesu dezenvolvimentu Greater Sunrise mós seidauk iha serteza. Ita tenke konsensu ona oinsá buka mina-matan tanba Bayu Undang menus daudaun ona. Ha’u hanoin nai ulun sira, liuliu líder polítiku sira tenke fó solusaun ba problema estadu nian. Buat ida-ne’e la haree opozisaun ka la haree Governu ka la haree povu. Kuandu la sériu entaun ita-nia nasaun sei problema. Ida-ne’e ha’u iha solusaun ne’ebé ke ita bele tetu hamutuk,” dehan Adriano Nascimento liuhosi plenária Parlamentu Nasionál, kinta ne’e.

Nia hatutan nasaun ida-ne’e presiza konsensu hodi nune’e identika fonte reseita hodi sustenta nasaun bá-oin.

“Konsensu atu ita tenke aselera ona dezenvolvimentu Greater Sunrise inklui ko’alia kadoras mai ka la mai, atu halo nusá, fahe halo nusá. Ne’e problema la’ós líder de’it maibé problema nasaun no problema dignidade nasaun nian,” nia fó hanoin ba Xefe Governu.

Nia fó hanoin ne’e tanba to’o agora estadu seidauk hetan mina-matan seluk atu substitui Bayu Undang. Aat liután COVID-19 paraliza rona ekonomia mundiál, liuliu Timor-Leste.

Iha parte seluk, Deputadu Bankada Demokrátiku ne’e subliña, solusaun ida mak Governu toma tiha inisitiva hamosu pakote rekuperasaun ekonómika no sujere atu implementa daudaun ona pakote rekuperasaun.

“Buat ruma seidauk loos ita aprende depois hadi’a. Ne’e kestaun Estadu la’ós kestaun Governu ka parlamentu nian,” nia dehan.

Adriano do Nascimento rekomenda konsensu nasionál ne’e la’ós ita atu fahe ministru ba malu ka la’ós fahe pasta ba malu maibé rekomendasaun ne’e atu fanun líder polítiku atu hanoin hamutuk kona-ba problema Estadu nian.

Deputadu Adriano do Nascimento afirma, se Primeiru-Ministru, Taur Matan Ruak dehan problema Estadu entaun luta ne’e sai kestaun.

Akordu ne’ebé Timor-Leste no Austrália asina iha sede Organizasaun Nasaun Unida (ONU), ne’ebé iha aneksu B (Rejime espesiál Greater Sunrise nian) artigu 2 (Propriedade kona-ba Petróleu no partilla reseita sira-nian) alínea 1, hateten Petróleu hotu ne’ebé produzidu iha kampu sira Greater Sunrise ne’e propriedade Timor-Leste no Austrália nian.

Alínea 2 hosi artigu 2, mensiona parte sira tenke partilla reseita sira hosi upstream, ka reseita sira direitamente rezultante hosi explorasaun upstream petróleu produzidu nian iha kampu sira Greater Sunrise.

Hosi artigu 2 mak define proporsaun hanesan tuir mai ne’e:
a. Iha proporsaun 70 porsentu ba Timor-Leste no 30 porsentu ba Austrália, sé hosi kampu sira Greater Sunrise sei dezenvolvidu liuhosi Gazodutu ida ba Timor-Leste, ka

b. Iha proporsaun 80 porsentu ba Timor-Leste no 20 porsentu ba Austrália, sé hosi kampu sira Greater Sunrise sei dezenvolvidu liuhosi Gasodutu ida ba Austrália.

Bainhira termina tiha opsaun rua ne’e entre Timor-Leste no Austrália hafoin tama ba tributasaun, kontratu partilla nian hosi produsaun Grater Sunrise nian, estabelese entidade regulatória sira, autoridade dezignada, konsellu supervizaun, komité rezolusaun litíjiu sira no foin tama ba planu dezenvolvimentu ba greater sunrise. Hosi planu dezenvolvimentu greater sunrise tama tán ba prosesu atu gazodotu sira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here