Organizasaun Mundiál ba Komérsiu. Imajen/Lideser

DILI, 01 outubru 2020 (TATOLI)–Ekipa traballu ne’ebé kompostu hosi membru Governu, entidade iha área ekonomia, inklui kurpu diplomátiku sira, partisipa enkontru altu nível ho maneira virtuál ba dahuluk Organizasaun Mundiál ba Komérsiu (OMK), tanba durante ne’e Timor-Leste sai hanesan observadór iha organizasaun ne’e.

Tuir Ministru Koordenadór Asuntu Ekonómiku, Joaquim Amaral, hateten ekipa ne’e daudaun halo hela esforsu atu integra iha organizasaun ne’e.

“Enkontru ne’e produtivu tebes no grupu traballu buka atu Timor-Leste tama lalais organizasaun mundiál komérsiu ne’e,” dehan Ministru Joaquim Amaral, hafoin enkotru altu nível, iha sala reuniaun Gabinete Fronteira Marítima, Palasiu Governu, kinta ne’e.

Ekipa ne’e lideradu hosi Embaixadór Portugal iha Zenebra ho apoiu hosi membru organizasaun.

Governante ne’e sente orgullu no previléjiu sai parte ida hosi organizasaun mundiál iha área ekonomia ne’e.

“Ita buka sai plenu membru, atu nune’e iha preferénsia iha komérsiu tanba ita integra iha organizasaun ne’e hanesan multilaterál ho membru hamutuk 164. Enkontru ne’e istóriku tanba Timor-Leste foin dahuluk tama iha prosesu adezaun sai membru organizasaun ne’e,” nia akresenta.  

Governu hatama ona aplikasaun atu sai nasaun membru ba organizasaun ne’e desde tinan 2015.

“Grupu  traballu ne’e harii iha tinan kotuk, ne’ebé ha’u kontinua serbisu ne’ebé ministru sira halo no ninia rezultadu maka ohin ita partisipa iha enkotru ne’e,”nia dehan.

Timor-Leste hetan apoiu tomak hosi  parte sekretariadu OMK iha Zenebra liuhosi treinamentu ein termu preparasaun atu kumpre no hadi’a rejime komérsiu.

“Ida-ne’e importante tebes tanba kuadu ita hadi’a rejime komérsiu bele ajuda no fasilita ita-nia prosesu adezaun ba organizasaun rejionál ne’e hanesan daudaun luta mós adere ba Asosiasaun Nasaun Sudeste Asíatiku (ASEAN, sigla inglés),” Ministru Joaquim Amaral informa.

Enkontru ne’e partisipa hosi Vise-Ministru Turizmu, Komérsiu no Indústria, Domingos Lopes Antunes, Vise-Ministru Saúde Bonifásio Maucoli dos Reis inklui entidade relevante seluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here