Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál, kinta (01/10). Imajen Tatoli/Egas Cristovão

DILI, 01 outubru 2020 (TATOLI)—Primeiru-Ministru (PM), Taur Matan Ruak, konsidera Orsamentu Jerál Estadu (OJE) 2020 ne’ebé aprezenta datoluk nu’udar orsamentu esperansa tanba durante fulan-sanulu nia laran, hahú janeiru 2020 Governu sustenta mákina Estadu ho orsametu duodesimál. 

“Ha’u fiar nu’udar orsamentu esperansa retoma retoma rekuperasaun, ne’ebé kontribui ba konfiansa sidadaun no permite fó hakat dahuluk hadi’a dalan nasaun. Hanesan mós biban di’ak atu labele filafali ba kotuk molok krize maibé bele transforma Timor-Leste sai nasaun sólidu no inkluzivu atu kumpre Planu Estratéjiku Dezenvolvimentu Nasionál no Roteiru ba Implementasaun Objetivu Dezenvolvimentu Sustentável,” dehan Xefe Governu, iha loron dahuluk debate Proposta OJE 2020 iha faze jeneralidade, iha sala plenariu, Parlamentu Nasionál (PN), kinta ne’e.

Tuir PM Taur, orsamentu ne’e hanesan biban atu transforma sidadaun hodi hanorin hakbiit no forma, la’ós de’it iha koñesimentu tékniku no sientífiku maibé iha kestaun karatér morál, étiku no sidadania di’ak ne’ebé responsável, disiplinadu, kompetente, kumpridór, empeñadu no tolerante liután hodi bele hatán ba país no merkadu traballu ninia nesesidade sira.

“Nune’e mós, biban atu transforma rekursu sira kona-ba oportunidade eskolla, oferta no asesu ba empregu kualifikadu ho kondisaun di’ak ka rendimentu dignu atubele aproveita investimentu projetada iha infraestrutura, komunikasaun, konetividade no setór ekonomia,” nia akresenta.

Xefe ezekutivu nota mós katak orsamentu ne’e bele transforma subsisténsia no dependénsia ba produtu hosi rai-li’ur no reziliénsia foun hodi multiplika oferta estrutura produtiva no harii kooperativa empreza kiik no média sira, ne’ebé bele investe hodi diversifikasaun produtu hodi garante produtividade no regularidade produsaun ne’ebé kontribui ba rezerva estratéjika no seguransa ai-han iha país ne’e.

“Biban atu transforma ita-nia empeñu no kompromisu ba dezenvolvimentu iha ambiente negósiu ne’ebé atrativu no bele kapta investimentu foun hosi rai-laran no rai-li’ur, ne’ebé aposta ba nesesidade estratéjika dezenvolvimentu iha parte tasi mane liuhosi projetu tasi mane ba kriasaun polu foun dezenvolvimentu rejionál ne’ebé bele hamenus dezigualdade no evita emigrasaun hosi fatin rurál sira mai Dili,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here