Ilustrasaun Violénsia Doméstika. Imajen/foti husi Google

DILI, 30 setembru 2020 (TATOLI)-Iha inísiu janeiru to’o setembru, tinan ne’e, Tribunál Distritál Dili (TDD) rejista kazu  krime violénsia doméstika (VD) ho natureza semi públiku no públiku hamutuk 284.

Notísia Relevante : PNTL rejista kazu violénsia doméstika 449

Juiz Administradór TDD, Afonso Carmona. Imajen/Dok.Tatoli

“Janeiru to’o mai setembru, tinan ne’e, krime ne’ebé tama iha TDD barak liu mak krime violénsia doméstika hamutuk 284,” informa Juiz Administradór Tribunál Distritál Dili (TDD), Afonso Carmona ba jornalista iha nia kna’ar fatin, Mandarin Dili.

Nia informa, kazu hirak ne’e rejista mai hosi area jurisdisaun Dili, Munisípiu Ermera, Liquiça no Aileu.

“Kazu ne’e ita sei identifika tanbasá ho númeru boot no kona-ba hira mak  iha ona desizaun, ha’u sei  hein relatóriu iha fulan ne’e remata bele hatene,” Afonso Carmona hateten.

TDD koloka juiz na’in-10 akompaña no ka’er prosesu  hodi bele atende julgamentu kazu ho natureza violénsia doméstika no krime violénsia doméstika ho númeru aas ho forma hanesan; ofensa simples, violasaun seksuál, maus tratus, no barak liu maka ofensa simples ho natureza semi públiku.

Afonso Carmona hateten, hafoin ferias judisiál, daudaun ne’e, TDD reativa julgamentu movel  hakbesik justisa ba povu ho di’ak liu no oinsá kontribui redús prosesu pendente sira iha Tribunál.

Tuir dadus husi TDD ne’ebé Agência Tatoli asesu hahú hosi janeiru to’o maiu, tinan ne’e, kazu krime ne’ebé finaliza hamutuk 494, kazu pendente 2.054 no kazu foun hamutuk 518, totál kazu sira ne’e seidauk  konta ho juñu no jullu.

Kazu sivíl ne’ebé finaliza durante janeiru to’o maiu, hamutuk 89, kazu sivíl foun 112, no kazu sivíl pendente hamutuk 5109.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here