Imajen ilustrasaun/Antaranews.com

DILI, 30 setembru 2020 (TATOLI)- Problema família uma-laran ne’ebé akontese iha Aldeia Labubu-Aidahu, Postu Administrativu Laclo, Munisípiu Manatuto, ohin, rezulta labarik mane ida ho tinan-tolu no nia aman, José da Costa mate fatin.

Informasaun ne’ebé Agência Tatoli rekolla hosi sasin balun iha fatin akontesimentu katak, vítima José da Costa iha problema ho nia kaben naran Berta.

Iha tuku 6:00  dadeer, sira hadeer hosi toba fatin konsege mosu dezentendimentu. Nune’e iha tuku 8:00 dadeer, matebian José da Costa, foti katana iha uma laran ho nervozu taa uluk ninia oan mane nia kakorok to’o mate kedas iha varanda oin, no nia  foti fali katana hodi ko’a rasik ninia kakorok to’o monu latan iha sira-nia varanda oin.

Akontesimentu ne’e halo, vítima nia família inklui viziñu sira ne’ebé haree ho matan trauma hodi kontaktu kedas Polísia Munisípiu Manatuto to’o fatin akontesimentu hodi evakua vítima José da Costa ba ospitál, maibé la konsege salva nia vida, tanba vítima nia kakorok kanek provoka raan sai maka’as.

Agência Tatoli tenta konfirma asuntu ne’e ba portavós PNTL, Superintendente Xefe, Arnaldo de Araújo, seidauk bele fó klarifíkasaun, tanba sei hein ekipa Investigasaun Kriminál PNTL Manatuto ne’ebé halo hela prosesu investigasaun kle’an hodi buka hatene motivu loloos hosi kazu omisídiu ne’e.

“Ha’u labele fó komentáriu, tanba ita sei hein rezultadu investigasaun hosi Komandu PNTL Manatuto,” dehan portavós PNTL, Arnaldo de Araújo via telefone.

PNTL Manatuto rasik evakua ona matebian na’in-rua ne’e mai Ospitál Nasionál Guido Valadares (HNGV) hodi hala’o prosesu autópsia foin entrega ba família hala’o serimónia funerál.

Maun taa alin

Iha parte seluk, PNTL Munisípiu Manufahi mós rejista kazu tentativa omisídiu ne’ebé halo hosi suspeitu ida ne’ebé sofre moras metál lori katana taa ninia alin Estevão Corte Real Leong ho tinan 40.

Kazu ne’e akontese, ohin, iha Aldeia Rialau, Postu Administrativu Same, Munisípiu Manufahi.

Suspeitu taa kanek ninia alin Estevão nu’udar mós doutór ida hosi Munisípiu Manufahi rezulta kanek maka’as iha oin.

Daudaun ne’e, ospitál Manufahi transporta ona vítima  hosi Manufahi mai Dili ho aviaun hodi hala’o tratamentu intensivu iha HNGV.

Parte PNTL Manufahi mós daudaun ne’e buka tuir ona suspeitu para submete ba investigasaun.

Asidente tráfegu iha Liquiça

Iha Munisipiu Liquiça mós akontese asidente tráfegu ida ne’ebé karreta mikrolete mutin ho naran Guajiro ho xapa 38429 soke no rezulta motorista mate fatin, pasajeiru na’in- rua kanek todan no na’in-tolu kanek kamaan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here