Ekipa ANPM halo aprosimasaun ho na’in kompañia iha postu abastasimentu kombustível Nagarjo, Baucau, tersa (29/09). Imajen Tatoli/Antónia Gusmão

BAUCAU, 29 setembru 2020 (TATOLI)–Ekipa hosi Diresaun Inspesaun Autoridade Nasionál Petróleu no Minerál (ANPM) suspende provizória postu abastesimentu kombustível Nagardjo Unipessoal Lda, ne’ebé lokaliza iha postu administrativu Baucau Vila, munisípiu Baucau.

Jerente Inspesaun Diresaun Downstream ANPM, Cornelio Russini Costa Pinto, hateten autoridade deside suspende atividade kompañia nasionál ne’e tanba seidauk hetan lisensa.

“ANPM halo ezekusaun suspende operasaun provizória hodi permite empreza bele prenxe rekezitu no hetan lisensa operasaun. Bainhira prenxe ona rekezitu tékniku no administrativu, bele loke hikas operasaun ho normál,” jerente ne’e relata iha postu abastesimentu kombustível Nagardjo, Baucau, tersa ne’e.

Antes ekipa ANPM atu dada fita iha dalan tama mákina mina nian,  ekipa sira realiza uluk diskusaun ho Diretór Nagardjo, Artur da Luz Costa, ho ninia advogadu iha resintu postu abastesimentu kombustível ne’e.

Jerente inspesaun dehan, ho knaar halo supervizaun no mós tau-matan ba área downstream ninian, ANPM hala’o ninia supervizaun dezde 2013, hahú hosi estabelesimentu dekretu-lei númeru 1/2012 no regulamentu komplimentár númeru 1/2013.

Momentu ne’ebá sosializa ona ba kompañia Nagardjo atu kumpre rekezitu durasaun ba kompañia durante tinan-lima nia-laran atu kumpre regulamentu tékniku maibé la konsege. 

“Ami konsege estende tan ba tinan-ida no rekursu hodi estende tan tinan-ida, entaun kompleta tinan-hitu nia-laran maibé Nagardjo la konsege prenxe rekezitu tantu administrasaun no téknika,” nia akresenta.

Ekipa ANPM halo aprosimasaun ho na’in kompañia iha postu abastasimentu kombustível Nagardjo, Baucau, tersa (29/09). Imajen Tatoli/Antónia Gusmão

Tuir jerente ne’e, bainhira kompañia kontinua la priénse rekezitu maka sei fó impaktu ba saúde públika ba abitante ne’ebé hela besik no bele fó ameasa ba meiu ambiente.

Tanba ne’e, ANPM ezije kompañia atu prenxe rekezitu atu salva guarda operasaun postu abastesimentu kombustível Nagardjo.

Rekezitu administrativu ne’ebé presiza kumpre lisensa operasaun tenke halo pagamentu ba taxa, tenke kria seguransa ba funsionáriu sira, tenke iha planu saúde seguransa ne’ebé adekuadu atubele asegura operasaun postu abastesimentu nian inklui iha lisensa ambientál.

Enkuantu seluk maka rekezitu tékniku hanesan prinsípiu instalasaun hanesan distánsia entre komponente sira iha postu nia-laran.

Prinsípiu operasaun, ba ema sira ne’ebé serbisu iha postu abastesimentu tenke hetan formasaun, atu nune’e bainhira akontese buat ruma iha instalasaun ne’e bele halo atuasaun urjente.

Aleinde ne’e, rekezitu ne’ebé importante atu kumpre maka tenke iha sinál iha postu abastesimentu ninia fatin tama no sai, nune’e bainhira ema ba ense mina bele atensaun hodi hamate veíkulu no telemóvel.

Seluk kona-ba selu taxa, ne’ebé depende ba kapasidade armajen hosi postu ida.

“Durante ne’e sira la kumpre obrigasaun selu taxa ba Estadu,” Jerente ne’e akresenta.

Tuir regulamentu ANPM, fó tempu ba kompañia durante tinan-lima no estende ba tinan-rua hodi prenxe rekezitu maibé durante ne’e la konsege kumpre, tanba ne’e autoridade foti desizaun hodi suspende provizória.

Iha fatin hanesan, Diretór Nagardjo Unipessoal Lda. Artur da Luz Costa, sente triste tanba ninia atividade ekonómika tenke taka provizória, maibé nu’udar sidadaun di’ak nia sei obdese ba regra ne’ebé vigora.

Diretór kompañia Nagardjo Unipessoal Lda, Artur da Luz Costa. Imajen Tatoli/Antónia Gusmão

“Haree ba regulamentu ANPM nian, nu’udar setór privadu prontu koopera hodi taka provizória no ha’u sei halo rekursu ba sira atubele loke hikas atividade,” na’in ba kompañia dehan.

Responsável ne’e kompromete sei kumpre regulamentu sira ne’ebé estabelese ona.

Maski nune’e, kombustível ne’ebé daudaun stoke sei iha postu abastesimentu ne’e, ANPM autoriza kontinua fa’an ba públiku, maibé bandu atu labele hatama tan mina no gazoel ba postu.

Antes autoridade atu dada fita hanesan símbolu taka provizória abastesimentu ne’e, konsege mosu dezentendimentu entre na’in ba kompañia no ekipa ANPM.

Diskusaun kontinua manas no membru Polísia ne’ebé fó seguransa konsege hakalma situasaun no deside ba rezolve iha Komandu Polísia Munisípiu Baucau.

Ikusmai to’o konkluzaun no kompañia prontu koopera ho ekipa ANPM hodi taka provizória atividade negósiu

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here