Diretora PNDS, Claudina Soares Pires. Imajen Tatoli/Egas Cristovão

DILI, 28 setembru 2020 (TATOLI)-Iha reuniaun Komité Revizaun Orsamentu Polítiku (KROP), Programa Nasionál Dezenvolve Suku (PNDS) hamosu proposta adisionál hamutuk milliaun $50, hosi tetu orijinál millaun $11 ne’ebé atribui hosi Ministériu Finansa (MF), hodi harii uma ba kbiit laek iha suku 424 iha territóriu Timor-Leste.

“Ami hetan konvite hosi Primeiru-Ministru atu halo aprezentasaun orsamentu PNDS, relasiona ho implementasaun harii uma ba kbiit laek ne’ebé mak ami hanoin katak implementa iha suku 424 no uma ne’ebé atu harii hamutuk 2.544, tanba ne’e presiza adisionál milliaun $50,” relata Diretora PNDS, Claudina Soares Pires, hafoin ramata reuniaun KROP iha MF, iha Aitarak-laran, segunda ne’e.

Dirijente ne’e dehan, PNDS propoin tipu rua ba konstrui uma, hanesan medida uma kuartu tolu prevee osan $15.250 to’o $17.000 no medida kuartu rua $15.000.00.

“Kondisaun balun ne’ebé mak presiza haree, hanesan kondisaun uma ne’e rasik, haree ba rendimentu hosi benefisiáriu, kondisaun rai, no benefisiáriu ne’e foka liu ba rendimentu kada família,” nia esplika.

PNDS iha ekipa verifikasaun, hahú hosi nível suku to’o nasionál sei koordena hamutuk ho Ministériu Solidariedade Sosiál no Inkluzaun (MSSI) no Sekretaria Estadu Protesaun Sivíl (SEPS) atubele hetan dadus ba ema kbiit laek.

Suku ida sei harii uma neen, ne’ebé atu identifika semak merese atu hetan uma ne’e, desizaun mai hosi autoridade suku no komunidade, enkuantu PNDS mak fasilitadór.

Tanba ne’e, sei fó apoia rekursu ba konstrusaun uma sira ne’e no orsamentu mai hosi Orsamentu Jerál Estadu (OJE) 2021.

Tuir proposta, programa ne’e sei kobre munisípiu 12 inklui Rejiaun Administrativa Espesiál Oé-cusse Ambeno (RAEOA), maibé iha munisípiu Dili kobre de’it ba postu administrativu Metinaru ho Ataúro.

Jornalista: Antónia Gusmão

Editora: Julia Chatarina  

1 KOMENTÁRIU

  1. Periodade prinsipal hanesan bee mos no estrada ba area suco importante tebes. Halo plano serbisu bazeia ba necedidade nebe importante tebes ralasiona ho dezenvolvimento economia rai larabln.. Povo persisa mak bee mos no estrada diak.. programa hari uma ba komunidade sei la fo impacto ba movimento economia povo kiik sira..

HAKEREK NO HATÁN

Please enter your comment!
Please enter your name here