Felisberto Maria dos Santos ‘Sole-Solep’. Imajen/Espesial.

Saudozu Sole-Solep mós nu’udar inisiadór ba asalta Marabia iha tinan 1980. Planu ne’e halo  hamutuk entre forsa gerrilla Bazartete no Laulara. Operasaun ne’e atu hatudu ba mundu katak rezisténsia Maubere sei kontinua nafatin. Tanba depois baze de apoiu rahun, inimigu  sira dehan funu hotu ona no ema rezisténsia sira la reziste ona iha ai-laran hodi kontra okupasaun illegal Indonézia iha Timor Lorosa’e.

DILI, 26 setembru 2020 (TATOLI)—Felisberto Maria dos Santos ‘Sole-Solep’, moris iha Bazartete iha loron 16 Agosto 1950. Oan hosi aman Mau-Olo no Inan Dau-Buti. Sole-Solep oan ba dala-11 hosi maun alin hamutuk na’in -12. Bainhira Sole-Solep kompleta tinan 18, nia hahú tama eskola primeira klase iha Eskola Misaun Bazartete, iha 1958 no ramata eskola kuarta klase iha 1962.

Hafoin ramata eskola, Sole-Solep tama servisu hanesan enfermeiru portugés nian iha 1962 to’o 1964. Momentu hanesan, Saudozu mós hatama dokumentu hodi konkorre ba vaga tropa portugés  nian. Sole-Solep sai tropa portugés iha 1965 to’o Indonézia invade Timor-Leste iha 07 dezembru 1975.

Aleinde sai tropa, iha tinan 1972, Sole-Solep sai profesór hodi hanorin iha Eskola Lacluta-Viqueque durante tinan rua (2). Hafoin ne’e, nia muda fali mai hanorin iha Eskola Lakapogoa Liquiça iha 1974 to’o golpe mosu.

Durante tempu portugés nian, Sole-Solep ninia maun alin na’in-hitu (7) inklui Mau-Olo (Sole-Solep nia aman) tenke fila hikas ba Maromak nia uman tanba sofre moras. Iha momentu bombardeiru militár  indonézia  nian, iha dezembru 1974, hanesan mós ho povu Timor sira seluk, Sole-Solep ho ninia família sira halai hodi subar iha ai-laran.

Situasaun susar tebes durante luta ba moris iha ai-laran, Sole-Solep nia inan doben Dau-Buti no nia feton Teresinha dos Santos tenke husik hela sira na’in-haat (4) iha mundu tanba sofre moras no hahan laek. Hafoin tuun hosi ai-laran no moris iha vila laran, Sole-Solep ho nia família la sente seguru.

Nune’e, iha tinan 1975, lori nia feen Filomena Maria Amaral ho nia oan hakiak Clara dos Santos ba hela iha Baucau. Triste boot hafalun tan familia Sole-Solep nia moris, iha 1978, nia lakon tan ninia espoza Filomena Maria Amaral tanba moras ho no mate ba hamlaha.

Liu tiha tinan ida, Sole-Solep ho ninia oan hakiak Carla dos Santos evakua fali mai Dili no kontinua ba hela iha Liquiça. Hafoin, baze de apoiu rahun iha parte loromonu entre tinan 1970 to’o 1978, iha tinan 1979 Saudozu Sole-Solep hasoru malu ho responsavel ba kaixa klandestina kamarada Alcino Chantal dos Santos “Ledo’’ (Liquiça-oan) iha Dili. Sira halo planu no planeia prosesu klandestina nian, lori Sole-Solep hala’o knaar klandestina rezisténsia nian iha Likisä.

Iha ne’ebá, iha tinan 1979, nia buka servisu nu’udar funsionáriu públika ka pegewai negeri sipil iha parte saúde nian. Durante servisu ba Governu Indonézia, nia mós halo polítika klandestina ba rezisténsia nian hodi bele halo ligasaun ho rezisténsia sira iha ai-laran. Nu’udar enfermeiru, nia kontinua nafatin halo ligasaun ho FALINTIL sira seluk iha ai-laran hodi distribui aimoruk ba FALINTIL sira iha ai-laran.

To’o juñu 1980, Sole-Solep nia rezisténsia ameasadu iha Liquiça. Maski nune’e, nia kontinua kontaktu ho kamarada Ledo hodi prepara aimoruk atu Sole-Solep foti halo tratamentu ba FALINTIL sira ne’ebé subar hela iha Foho Pisu, Suku Lauhata–Likisa nian. Ledo rasik mós labele ba Liquiça tanba inimigu komesa hatene nia hanesan responsavel ba kaixa klandestina nian iha Liquiça.

Saudozu Sole-Solep mós nu’udar inisiadór ba asalta Marabia iha tinan 1980. Planu ne’e halo  hamutuk entre forsa gerrilla Bazartete no Laulara. Operasaun ne’e atu hatudu ba mundu katak rezisténsia Maubere sei kontinua nafatin. Tanba depois baze de apoiu rahun, inimigu dehan funu hotu ona no ema rezisténsia sira la reziste ona iha ai-laran hodi kontra okupasaun illegal Indonézia iha Timor Lorosa’e.

Hafoin akontesimentu Marabia, militár Indonézia asalta Saudosu Sole-Solep iha Liquiça maibé momentu ne’e la konsege kaptura, tanba nia halai ona ba iha ai-laran hodi moris hamutuk gerrileiru sira iha ai-laran atu “Resiste e Vecer”.

Iha ai-laran, sira konsege halo reuniaun iha loron 01 agostu 1980 iha Tibar, Saudozu Sole-Solep ho forsa FALINTIL sira seluk deside hodi ba hamutuk ho gerrilleiru sira seluk iha parte lorosa’e .

Hafoin la’o durante tinan hirak nia laran, Sole-Solep ho FALINTIL sira seluk konsege to’o duni iha Bibileo. Iha ne’ebá, sira hasoru malu ho Camadante em Chefe das FALINTIL, Kay Rala Xanana Gusmão no Vise-Comadante em Chefe das FALINTIL, Taur Matan Ruak. Iha soru -mutu ne’e, Camadante em Chefe promove Saudozu Sole- Solep hanesan adjuntu Komadante Rejiaun III Cruzeiru. Nune’e, Cesar dos Santos da Silva “Merak” mós sai adjuntu Rejiaun IV.

Momentu ne’e mós fahe kedas forsa sira ba grupu rua hodi dezloka iha parte  lorosa’e no loromonu. Iha 1986, Sole-Solep hetan orientasaun hosi David Alex “Daitula” hodi tun mai Dili atu hamutuk ho responsavel kaixa klandestina Ledo iha Santa Cruz, hodi organiza rede klandestina nian.

La sente seguru iha Santa Cruz, Sole-Solep muda fali ba Ai-Look Laran. Iha ne’eba, Saudozu ho rede kaixa ida naran Augusto P. dos Santos halo negósiu fa’an nuu maran, ai-farina no produtu lokal sira seluk, iha Dili laran.

Politika ne’e nu’udar meiu ida hodi Sole-Solep bele halo kontakta ho rede klandestina sira iha área Dili nian. To’o iha tinan 1997, Sole-Solep muda fali ba Liquiça  nu’udar enfermeiru. Saudozu kontinua hala’o servisu nu’udar klandestina iha Liquiça to’o Maliana. Maibé, iha tempu ne’ebá, militár Indonézia  komesa horon ona iis hosi servisu klandestina ne’ebé Sole-Solep hala’o.

Polítika Indonézia nian ida mak uza fali rede klandestina ida ho naran Domingos Laranjeira hodi bele identifika servisu Saudozu Sole-Solep nian. Nune’e, iha 30 marsu 1997, maizumenus tuku 05:00 madrugada, Sole-Solep ho Marcelino Francisco dos Santos, Jose Soubral no Domingos Laranjeira ba Batugade ho motorizada rua. Tuir planu, sira sei hakat liubá Betun-Atambua hodi kontinua ba habelar rede klandestina nian iha Oé-Cusse.

Saudozu Sole-Solep tula malu ho Domingos Laranjeira iha motor ida no Marcelino Francisco  dos Santos ho Jose Soubral hamutuk uza motor ida. Bainhira to’o iha dalan klaran, militár Indonézia nian hatais roupa sivíl tahan sira na’in haat. Bapa sira ne’e husu ba Domingos katak ema sira ne’e sé? Maibé Domingos dehan nia maun no tiun sira.

Hotu tiha, militár husik sira na’in-haat (2) livre no hatutan sira-nia viajen ba Oé-Cusse. To’o iha Batugade maizumenus tuku 09:00 hanesan ne’e. Iha ne’ebá, sira hetan tan militár sira halo pasa – revista. La husu buat barak, militár sira-ne’e mós kaptura kedas Sole-Solep, Marcelino Francisco dos Santos no Jose Soubral hodi kesi sira-nia liman no futu metin iha ai-laran tuan ida. Maske sira na’in-haat (4) mak la’o hamutuk maibé Domingos militar sira la kaer no husik livre.

Nune’e, karreta ida tula ona sira ho matan kesi metin, lori mai iha SGI Colmera, Dili. Durante iha dalan, sira hetan torturasaun makaas hosi militár Indonezia sira,. To’o iha fatin, bapa sira mós kore sira-nia matan, sira haketak ba malu na’in-tolu (3) dei’t, Domingos laiha ne’ebá. Iha loron ne’e kedas, militár Indonézia tula fali ho ró ba área Atauru nian. Nune’e, ró para de’it iha tasi klaran. Iha ne’ebá, tasi laran ne’e mak militár sira halo torturasaun hanesan baku, tuku, no tebe sira sira na’in tolu to’o dolar didi’ak mak hafoin lori fila-fali mai iha SGI Colmera, Dili.

Durante loron lima (5) detein iha SGI Colmera, Dili, militár Indonézia halo investigasaun ba sira no halo torturasaun makaas inklui inklui xoke ho eletrisidade. Iha loron 4 abril 1997, militár Indonézia kontinua kesi metin nafatin sira-nia matan no liman hodi tula sai husi Colmera, Dili. Durante iha dalan klaran, Sole-Solep mak hetan torturasaun makaas. Liu tiha oras balu, sira to’o iha Rumah Merah Baucau.

Iha loron 05 abril, Sole-Solep detein hamutuk ho Jose Soubral to’o loron 07 maiu 1997. Nune’e Marcelino bapa sira lori sai hosi Baucau ba Lospalos hodi detein iha fatin ida naran (Messgula). Liu tiha fulan ida, iha 08 maiu 1997, militár Indonézia muda Sole-Solep hosi Rumah Merah  Baucau maibé atu ba iha fatin ne’ebé laiha ema ida mak hatene.

Hosi momentu ne’e, família esforsu hodi buka tuir Sole-Solep, sira tenta dala-haat (4) atu hatene tuir Sole-Solep nia paradeiru agora ne’e iha ne’ebé. Dahuluk, família ba hamutuk ho Palang Merah (Cruz vermelha) hodi ba husu iha SGI Colmera iha maiu 1997, sira la hetan resposta sertu. Família sira hosi Sole-Solep ho Jose Soubral nian fotografia ba hasoru komandante  SGI nian iha Colmera, Dili, maibé nia dehan la hatene buat ida.

Iha 14 setembru 1998, família hamutuk ho Komisi Keadilan dan Perdamaian Keuskupan Dili ba hasoru dala ida tan Kapten Serangat iha SGI Colmera, maibé sira la fó hatene. Esforsu família nian la to’o iha ne’e de’it, iha tempu ukun aan nia laran, iha 2010, família ba husu tuir iha Komisaun Omenajen no Komisaun 12 Novembru maibé sira mós laiha informasaun kona-ba saudozu ninia paradeiru.

Durante tempu rezisténsia nia laran, Sole-Solep hamutuk ho maun-alin na’in-ualu (8) inklui inan-aman lakon vida tanba hahalok funu nian. Oras ne’e, daudaun hela de’it Sole-Solep ninia feton na’in rua Agostinha Soares no Olandina Soares mak sei moris hela.

Tanba buka be la hetan, mak iha loron 26 fula setembru tinan 2020 ne’e, iha Suku Lauhata-Liquiça, komisaun organizadora sira inaugural monument saudozu adjuntu polítiku sivíl no mlitár rejiaun III, Felisberto Maria dos Santos “Sole-Solep”, nu’udar monumentu ida ne’ebé sai hanesan parte ida hosi “reparasaun koletiva” ida, atu nune’e familia sira kada tinan bele hanoin hetan fali saudozu ninia memória pasada sira ne’e atu labele mate no la mate tan.

TATOLI

HAKEREK NO HATÁN

Please enter your comment!
Please enter your name here