Jogador Lica Lica kontra atake husi jogador Boavista FC.Imajen/Midia FFTL.

DILI, 25 setembru 2020 (TATOLI)-Klube zigante kapitál Dili Boavista Fc Timor pasiensia tenke fahe pontu ho ninia adversáriu Lica-Lica Lemorai Fc tanba rezultadu jogu iha sesta ne’e empata 2-2, iha kopa FFTL ne’ebé hala’o iha Estádiu Munisipál Dili.

Hosi rezultadu ne’e, hamihis tebes Boavista nia mehi atu hakat ba oitavu finál iha grupu D nian tanba sei hela jogu ida de’it no daudauk ne’e nia iha pontu haat (4).

Notísia Relevante :Kefi ho Boaten lori Boavista manán Emanuel

Lica-Lica pontu (1), enkuantu AD. SLB Laulara mak hanesan ekipa juara pool ho pontu sia hodi lidera tabela klasifikasaun provizóriu iha grupu D, Kablaki pontu tolu (3) no Emanuel pontu 0.

Iha primeira parte jogu ne’e la’o, ekipa Lika-Lica hatudu jogu bonitu hodi halo presaun maka’as ba Boavista ho golu ne’ebé lais iha minutu ida liuhosi jogadór, Miguel Barreto (10). Boavista book aan araska atu hamate bola husi Lica Lica.

Iha minutu balun de’it,  treinadór Boavista, Miro Baldo Bento muda estratejia jogu hodi fó oportunidade ba nia avansadu Edit Savio no Fransyatma Kefi atu ultrapasa defeza Lica-Lica maibé la konsege no sutu barak mak sira lansa hetan salvasaun hosi gurda rede Lica-Lica Fernando da Costa (13).

Jogu komesa manas liután no Lica-Lica tenta hamate bola hosi Boavista iha minutu ’13, Manuel da Silva (11) hosi Lica-Lica fura tan rede Boavista hodi muda rezultadu ba 2-0 to minutu 45 primeiru jogu nian termina laiha tan golu ruma mak akontese.

Nun’e iha jogu segunda parte, Boavista halo mudansa totál ba nia jogu tanba lansa kontra atake ne’ebé maka’as hodi ameasa  rede Lica-Lica nune’e iha minutu ’61, Edit Savio (9) konsege marka golu ida hodi muda rezultadu ba 2-1.

Maibé ho kontra atake ne’ebé manas iha rede Lica-Lica nia oin Fransyatma Kefi (21) prodúz tan golu ida iha minutu ’62, nune’e rezultadu muda ba 2-2.

Iha minutu sira tuirmai ekipa rua la konsege hatama golu ba malu nune’e termina jogu ne’e iha minutu 90+3.

Iha jogu ne’e Arbitru Pedro Carvalho ho ninia ekipa fó kartaun mean ba jogadór Nelson dos Santos husi Lica Lica tanba halo erru boot hasoru jogadór baovista iha minutu 90+3.

Aleinde fó kartaun mean, jogadór João Soares, Pedro Vicente no Evanio Castelo mós hetan kartaun kinur husi arbitru.

Notísia Relevante :Boavista Manán Mihis Ultramar

Jornalista: Hortencio Sanchez

Editór : Agapito dos Santos

HAKEREK NO HATÁN

Please enter your comment!
Please enter your name here