DILI, 25 setembru 2020 (TATOLI)-Alumi Parlamentu Foinsa’e Timor-Leste (APFTL), hamrik ho ninia objetivu atu dezenvolve kapasidade foinsa’e sira nian ba atinje objetivu haat maka hanesan rezilente, vizionáriu, demokrátiku no sivilizadu ba apoiu dezenvolvimentu nasionál.
Prezidente Alumi Parlamentu Foinsa’e Timor-Leste (APFTL), Zaulino Gomes da Silva, hateten atu implementa objetivu hirak ne’e maka membru APFTL sira fó dedikasaun servisu ba organizasaun ho espíritu voluntarismu, ativismu, sivismu.
”Durante APFTL nia ejisténsia tinan lima joven hamutuk rihun 21 mak benifisiu ba programa ne’e tanba durante iha mandatu ha’u nian mak buat prinsipál ida hadi’a mak sistema administrasaun iha organizasaun no mandatu ne’ebé simu dezafiu mak organizsaun ne’e laiha rekursu finanseiru depois mós laiha rekursu umanu,’’ nia dehan ba jornalista sira iha salaun Canosa Becora Dili, sesta ne’e.
Durante tinan 2019 no 2020 ne’e, APFTL foku liuba dezenvolvimentu institusionál no rekursu umanu.
”Entaun programa ba joven sira durante tinan lima mak ita dezenvolve koñesimentu joven sira oinsá moris ho hahalok siviku, moris diak no moris ne’ebé hatene respeitu ba regra hatene respeitu ba diversidade,” nia informa.
Nune’e oriente joven sira atu iha koñesimentu ko-naba moris saudavel, prevene uza droga no kestaun seluk tan.
Jornalista : Felicidade Ximenes
Editór : Agapito dos Santos
