Logotipu MEJD

DILI, 24 setembru 2020 (TATOLI)-Ministériu Edukasaun Juventude no Desportu (MEJD), liuhosi Unidade Kurríkulu Nasionál, oras ne’e elobora ona matríz ba ezame nasionál hodi distribui ba profesór sira iha Munisípiu 12 inklui Rejiaun Administrativa Oé-Cusse Ambeno (RAEOA), ne’ebé atraza iha prosesu aprendizajen relasiona ho pandemia globál COVID-19.

Koordenador Unidade Kurikulum Nasional (UKN), Pedro Ribeiro Gonçalves, hateten ho matríz ba ezame nasionál sei tulun profesór sira atu prepara materia ba estudante finalista sira ne’ebé sei hala’o fulan-novembru ne’e.

Tanba profesór barak maka la konsege hanorin durante implementasaun Estadu Emerjénsia (EE).

“Ita halo ona elaborasun materia pontu hodi fahe ba profesór sira hotu iha Munisípiu laran tomak atu ajuda profesór sira ne’ebé karik lakon ona iha aula prezensiál hodi nune’e sira bele halo preparasaun ida di’ak iha tempu badak hodi hakat ba ezame nasionál,” nia hateten ba jornalista sira iha Parlamentu Nasionál , kinta ne’e.

UKN informa ona prosesu ba Ministru Edukasaun Juventude no Desportu, Armindo Maia, nune’e bele imprime hodi distribui ba territóriu Timor-Leste.

“Kalendariu imprime nian ita tau ona iha fulan-outubro agora ita hein de’it desizaun Ministru nian ba prosesu imprisaun,” nia esplika.

Jornalista : Tomé Amado

Editór : Agapito dos Santos

HAKEREK NO HATÁN

Please enter your comment!
Please enter your name here