Ilustrasaun Karate-do. Imajen/Espesiál

DILI, 24 setembru 2020 (TATOLI)-Sekretáriu Jerál Federasaun Karate-do Timor-Leste (FKTL)), António Carlos de Araújo, hateten iha fulan-novembru 2020, nia parte sei hala’o kampionatu nasionál hodi halo selesaun ba fini atleta ne’ebé di’ak hodi prepara ba futuru.

Prezidente Shotokan Karate-do Internatinonal Federation of Timor-Leste (SKIFTL), António Carlos de Araújo. Imajen/espesiál

“Tuir proposta ne’ebé ami hato’o ba Sekretáriu Estadu Juventude no Desportu, katak kampionatu nasionál hala’o iha juñu nia laran hodi kompete iha jogu CPLP maibé la konsege, ne’e mak novembru ami foin hala’o fali, hahú iha 26 to’o 28 hodi komemora loron proklamasaun,” dehan Sekretariu Jeral ne’e ba TATOLI iha Jináziu Dili, kinta ne’e.

Nia dehan, kompetisaun ne’e hala’o tanba hetan ona apoiu orsamentu rihun 14-resin hosi SEJD.

“Osan iha ona tanba apoiu hosi SEJD, kompetisaun ne’e hala’o ba atleta sira ho idade 17 mai kraik,” nia dehan.

Entretantu, eventu ne’e sei partisipa husi klube karate-do maihosi munisípiu 12 inklui Rejiaun Administrativa Espesiál Oé-Cusse Ambeno (RAEOA), no kada munisípiu reprezenta ema na’in haat kompostu husi feto rua no mane rua.

Enkuantu, iha eventu ne’e komisaun sei prepara premiu ba manán nain sira hanesan medalla no osan.

Federasaun daudaun ne’e komesa hikas ninia atividade hanesan baibain ne’e hafoin paradu durante fulan hirak liubá tanba pandemia surtu COVID-19.

“Agora ami hala’o hikas ona atividade hanesan baibain, agora iha fatin-fatin atividade treinamentu la’o normal ona,” nia hateten

Nia tenik tan, FKTL iha ona membru hamutuk 4.000-resin maka espalla iha Timor-Leste. “Ami agora sa’e ba rihun haat-resin  ona kompostu hosi labarik kiik to’o ema bo’ot kada tinan ami-nia membru komesa aumenta beibeik,” nia informa.

Jornalista: Hortencio Sanchez

Editór   : Agapito dos Santos

HAKEREK NO HATÁN

Please enter your comment!
Please enter your name here