Ministru Turizmu Komérsiu no Indústria, José Lucas do Carmo da Silva, akompaña hosi Embaixadór Xina iha Timor-Leste, Xiao Jiagou, no entidade relevante halo lansamentu e-cerificate of origin, iha edifísiu MTKI, Mandarin, kinta (24/09). Imajen Tatoli/Egas Cristovão

DILI, 24 setembru 2020 (TATOLI)-Ministériu Turizmu Komérsiu no Indústria (MTKI) liuhosi Diresaun Nasionál Komérsiu Esternu, ofisialmente halo lansamentu dahuluk ba sertifikadu orjinál ho sistema eletróniku (e-certificate) atu fasilita emprezáriu sira halo atividade negósiu ba esportasaun no importasaun.

Ministru Turizmu Komérsiu no Indústria, José Lucas do Carmo da Silva, hateten sertifikadu orijinál ho sistema eletróniku ne’e hetan apoia husi Governu Xina, tanba ne’e nia apresia ba kolaborasaun ne’e. 

“Iha períodu dijitál hanesan agora, ita presiza tebes buka meiu atubele akomoda interese halo negósiu, ho nune’e bele fasilita sira kompete iha merkadu rejionál no internasionál,” dehan Ministru José Lucas iha seremónia lansamentu iha edifísiu MTKI, Mandarin, kinta ne’e.

Ministru Turizmu Komérsiu no Indústria, José Lucas do Carmo da Silva. Imajen Tatoli/Egas Cristovão

Ministériu ne’e inisia halo sertifikadu ho forma eletróniku ho hanoin atu kria atendimentu públiku  lalais, fasil no transparente.

Goverante ne’e iha esperansa, e-certificate sei haforsa, hakbiit, interasaun dadus orijen iha Timór ho nivél rejionál ho internasionál ein termu hala’o negósiu.

“Medida estratéjiku ne’e ita opta atu hasa’e kompetibilidade merkadu iha nível rejionál no internasionál, nune’e atu dudu Timor-Leste adopta prátika ho negósiu inovativu no enkoraja fasilidade negósiu ne’ebé ke adopta iha nível rejionál no mós  internasionál,” nia akresenta.

Lansamentu produtu ne’e aliña ho programa ne’ebé maka diretiva iha implementasaun programa servisu dijitál ninian.

Iha fatin hanesan, Embaixadór Xina iha Timor-Leste, Xiao Jiagou, konsidera kooperasaun Timor-Leste no Xina durante ne’e iha ambiente di’ak tebes no pozitivu.

Embaixadór Xina iha Timor-Leste, Xiao Jiagou. Imajen Tatoli/Egas Cristovão

“Ha’u nu’udar reprezentante nasaun Xina nian iha Timor-Leste, hato’o ha’u-nia agradesimentu ba parte komérsiu, ministériu no ema hotu ne’ebé maka servisu hamutuk ona hodi realiza programa ne’e,” dehan diplomata xinez ne’e.

Nune’e mós, Diretór Kompañia ACELDA, Higino da Costa, sente kontente tanba ho inisiativa ne’e bele aselera prosesu esportasaun sira ba rai-li’ur.

“Ho sertifikadu eletróniku ne’e bele ajuda ona ami nu’udar emprezáriu sira hodi halo atividade esportasaun no importasaun,” dehan Jerente kompañia nasionál ne’e.

Seremonia ne’e partisipa husi Vise-Ministru Turizmu, Komérsiu no Indústria, Vise-Prizidente Kámara Komérsiu Indústria Timor-Leste  (CCI-TL, sigla portugés), emprezáriu sira no entidade relevante.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here