Ministru Administrasaun Estatál, Miguel Pereira de Carvalho. Imajen Tatoli/Egas Cristovão

DILI, 24 setembru 2020 (TATOLI)—Governu liuhosi Ministériu Administrasaun Estatal (MAE) sei kontinua halo transferénsia ba suku sira hodi implementa Programa Nasionál Dezenvolvimentu Suku (PNDS) iha fulan-novembru no dezembru 2020.

Notísia Relevante: MAE sei promove desentralizasaun administrativa-konserva dokumentu istóriku iha 2020

Ministru Administrasaun Estatal, Miguel Pereira de Carvalo, ohin, hala’o audiénsia públika ho deputadu sira hosi Komisaun A (Justisa no Konstituisionál) kona-ba proposta orsamentu 2020 nian ho montante $ 14,729,411.

Hosi montante orsamentu millaun $14-resin ne’e kategoriza saláriu no vensimentu $3,630,000, bens no servisu $2,633,076, kapitál minór $25,000, laiha kapitál dezenvolvimentu no transferénsia públika $8,441,335.

Ministru Administrasaun Estatal, Miguel Pereira de Carvalho, esplika proposta ne’e engloba atividade prinsipál hosi ministériu refere hanesan organizasaun urbana, desentralizasaun administrativa, programa nasionál dezenvolvimentu suku, aktu eleitorál no kalendáriu sira no mós arkivu nian.

Miguel de Carvalho hateten, ba tinan fiskál 2020 la eziste medida foun sira tanba proposta OJE 2020 nian ne’e atu rekupera fila-fali despeza sira-ne’ebé maka ministériu ne’e halo ona durante janeiru 2020 to’o oras ne’e, no mós atu aprezenta orsamentu ba despeza balu ne’ebé mak ministériu bele halo iha fulan outubru, novembru no dezembru.

“Maske nune’e iha OJE 2020 maibé Ministériu Administrasaun Estatal liuhosi Programa Nasionál Dezenvolvimentu Suku sei kontinua halo transferénsia orsamentu ba suku sira pur volta $49 mill ne’ebé mak balu halo ona no balun sei halo iha fulan-novembru no dezembru nia laran,” Ministru Administrasaun Estatal Miguel de Carvalho esplika ba jornalista sira hafoin audiénsia públika ne’e iha Parlamentu Nasionál, kinta ne’e.

Tuir dokumentu ne’ebé deskreve Planu Asaun Anuál (livru 2) refere programa ho kódigu 518 kona-ba dezenvolvimentu suku sira no retornu ekonómiku bázika ho orsamentu $7,393,697 komposta hosi saláriu no vensimentu $202,362 no transferénsia públika $7,191,335.

Entretantu Ministériu Administrasaun Estatal sei transfere orsamentu kuaze rihun $49 ne’ebé Ministru Administrasaun Estatal ne’e temi iha leten hosi montante $7,191,335 ne’ebé prevee iha transferénsia públika nune’e suku sira-ne’ebé hetan projetu PDNS ne’e implementa.

Orsamentu hirak ne’e, oras ne’e iha faze audiénsia ho reprezentante povu sira  maibé sei hein aprovasaun hosi plenária iha tempu badak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here