Komandante PNTL Munisípiu Dili, Superintendente Xefe Henrique da Costa. Imajen Tatoli/Eugénio Pereira

DILI, 24 setembru 2020 (TATOLI)- Komandu Polísia Munisípiu Dili hatún ona despaxu hodi koloka membru Ofisiál Polísia Suku (OPS) iha suku hotu iha Dili laran atu ajuda polísia tránzitu hodi halo kontrolu ba movimentu transporte públiku iha suku hotu- hotu iha Dili laran.

Komandante PNTL Munisípiu Dili, Superintendente Xefe Henrique da Costa dehan, knaar OPS la’ós atu haree de’it servisu komunitáriu nian, maibé ajuda mós Komandu PNTL liuhusi Unidade Tránzitu Seguransa Rodoviáriu kontrola movimentu transporte iha tempu dadeer no lokraik labele mosu engarrafamentu no evita asidente tráfegu.

Nia dehan, númeru polísia Dili hamutuk 500-resin la sufisiente, tanba ne’e Komandu Dili orienta OPS ajuda servisu kontrola movimentu transporte no ema la’o ain iha estrada públiku.

Funsaun servisu OPS mós atu kontrola karik motorista sira tula ema ho motór la uza kapasete, laiha xapa matrikula ka kontra regra tránzitu, maka OPS bele halo apreensaun.

“Agora daudaun ita reforsa tan ita nia OPS sira koloka iha estrada públiku sira iha para ajuda servisu kontrola transporte no ita nia populasaun sira para evita mosu asidente no engarrafamentu iha tempu dadeer no lokraik,” hateten Komandante Henrique  da Costa, durante hala’o enkontru ho entidade órgaun komunikasaun sosiál sira, ohin, iha Komandu PNTL, Caicoli, Dili.

Nia hatutan, knaar OPS koordena ho membru Konsellu Polisiamentu Komunitáriu (KPK) hodi garante mós seguransa no prevene konflitu no buka realiza enkontru ho povu  rezolve problema no halo virilidade tama-sai suku sira.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here