Prezidente Autoridade Munisipiu Baucau, António Guterres. Imajen/Cancio Ximenes

DILI, 23 setembru 2020 (TATOLI)–Prezidente Autoridade Munisípiu Baucau, António Guterres, informa xefe suku sira iha Munsípiu Baucau simu ona farda hosi Governu.

hamutuk 59 kompostu hosi mane na’in-55 no feto na’in-haat (4) ne’ebé mak simu ona farda ba xefe suku horisehik.

“Xefe suku sira iha Munsípiu Baucau hamutuk 59 kompostu hosi mane na’in-55 no feto na’in-haat (4) simu ona farda ba xefe suku sira-nia hosi Governu,” dehan Prezidente Autoridade Munisípiu Baucau, António Guterres, ba Agência TATOLI liuhosi telefonika, tersa ne’e. 

Maibé, nia hatutan, iha xefe suku balun seidauk simu hanesan Suku Seiçal no Bucoli, Postu Administrativu Baucau Vila nian, Suku Atelari Postu Administrativu Laga nian inklui ho suku rua hosi Postu Administrativu Baguia. 

Nia dehan, xefe suku sira ne’ebé mak seidauk simu farda ne’e sei ba direta iha dirasaun apoiante suku nian mak bele foti.

Ho distribuisaun farda ba xefe suku sira, nia dehan, nu’udar reprezenta Governu Sentrál iha Munisípiu Baucau, agradese ba Governu sentrál nia atensaun hodi dignifika no valoriza lideransa komunitária liuliu xefe suku sira.

Tanba, tuir nia, suku ida xefiadu hosi xefe suku ida tenke dignifika no valoriza sira mezmu sira ne’e nu’udar lideransa komunitária no organizasaun komunitária nian maibé iha ligasaun ho administrativa entaun DNAAS-MAE iha rekoñesimentu ida hodi kontinua dignifika no valoriza sira hanesan lideransa komunitária iha suku ida.

“Ita tenke dignifika no valoriza nafatin ita-nia xefe suku sira mezmu sira hanesan lideransa komunitária, organziasaun komunitária nian maibé sira mós halo servisu administrasaun munisípiu entaun Governu tenke rekoñese sira-nia ezisténsia,” nia dehan. 

Farda ne’ebé mak DNAAS-MAE entrega ba xefe suku sira, nia informa, iha faru rua (2) liman badak no naruk, kalsa rua (2) inklui ho sapatu.

Prezidente ne’e haktuir katak prosesu produsaun farda ba xefe suku nian ne’e planu Governu sesante nian iha tinan kotuk entaun planu kontinua to’o tinan ne’e no horisehik xefe suku sira konsege simu ona farda refere.

Munsípiu Baucau kompostu hosi Postu Administrativu neen (6) no suku sira hamutuk 59. Hosi Postu Administrativu Baucau Villa kompostu hosi suku 11, Baguia iha suku 10, Laga iha Suku ualu (8), Quelicai iha suku 15, Vemasse iha suku hitu (7) no Postu Administrativu Venilale iha Suku ualu (8). 

Postu Administrativu Baguia kompostu hosi Suku Afaloicai, Alawa Craik, Alawa Leten, Defawasi, Hae Coni, Larisula, Lavateri, Osso Huna, Samalari, no Suku Uacala.

Postu Administrativu Baucau kompostu hosi Suku Bahu, Bucoli, Buibau, Buruma, Caibada, Gariuai, Samalari, Seiçal, Tirilolo, Triloka, no Suku Uailili. 

Postu Administrativu Laga kompostu hosi Suku Atelari, Libagua, Nunira, Saelari, Sagadate, Samalari, Soba, no Suku Tequinaumata. 

Postu Administrativu Quelicai kompostu hosi Suku Abafala, Abo, Afaça, Baguia, Bualale, Guruça, Lacoliu, Laisorolai, Laisorolai de baixo, Laisorolai de Cima, Lelalai, Letemumo, Macalaco, Maluro, Namanei, no Suku Uaitame.

Postu Administrativu Vemasse kompostu hosi Suku Caicua, Loilubo, Ossouala, Ostico, Uaigae, Uatu-Lari, no Suku Vemasse. Postu Administrativu Venilale kompostu hosi Suku Bado-Ho’o, Baha Mori, Fatulia, Uai Oli, Uailaha, Uatu Haco, Uma Ana Ico, no Suku Uma Ana Ulo. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here