Ofisiál F-FDTL iha selebrasaun aniversáriu FALINTIL ba dala-44 iha Kuartél Jenerál Fatuhada, Dili, 20 sgostu 2019. Imajen Tatoli/António Gonçalves

DILI, 23 setembru 2020 (TATOLI)-Ezekutivu sira liuhosi reuniaun Konsellu-Ministru (KM) halo diskusaun ba proposta rua ne’ebé maka aprezenta hosi Ministru Defeza (MD), Filomeno da Paixão de Jesus.

Ministru Prezidénsia Konsellu Ministru, Fidelis Manuel Leite Magalhães, hateten projetu rua ne’e mak hanesan polítika-lejizlativa sira relasiona ho projetu dekretu-lei kona-ba rejime remuneratóriu FALINTIL-Forsa Defeza Timor-Leste (F-FDTL) no projetu dekretu-lei relasiona ho regulamentu kona-ba Lei Servisu Militár nian.

“Iha aprezentasaun ne’e, Ministru Defeza hato’o hanoin balun kona rejime remuneratóriu ba F-FDTL, maibé ne’e foin aprezentasaun no foin hahú diskusaun, ne’ebé tempu oin mai sei halo diskusaun kle’an liután”, relata Ministru Fidelis hafoin ramata reuniaun KM, iha Palásiu Governu, kuarta ne’e.

Governante ne’e haktuir, iha aprezentasaun ne’e MD konsidera presiza haree filafali remunerasaun F-FDTL tanba hafoin iha tinan hirak nia laran nota katak la korresponde ho kustu moris loron-loron.

“Ministru Defeza aprezenta kestaun ne’e atu Konsellu Ministru tetu, maibé ministru sira seluk mós temi kona-ba sira-nia área rasik hanesan instituisaun públiku sira iha,” nia akresenta.

Tanba ne’e, Governu iha hanoin atu proposta sira hosi instituisaun Estadu sira bele haree lalais ho levantamentu.

“Nune’e bele fó informasaun loloos kona-ba kustu vida iha Timór no Governu bele halo polítíka ida ba entidade Estadu sira hotu,” esplika Portavós.

Hafoin reuniaun ezukutivu, orientasaun hosi KM atu Ministériu Finansa bele halo levantamentu no relatóriu ida kona-ba kustu vida Timór atu nune’e Governu halo politíka remuneratóriu jerál ida ba instituisaun Estadu hotu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here