Imajen TATOLI/Osoria Marques.

DILI, 23 setembru 2020 (TATOLI)–Sala Leitura Xanana Gusmão (SLXG) hamutuk ho Youth Community Care (YCC) selebra loron Mundiál Lian Jestuál iha 23 setembru 2020 hodi hala’o atividade semináriu loron sorin ho Klibur Defisiénsia Tilun Timor-Leste (KDTTL) no Polísia Unidade Tránzitu (PUT) ne’ebé realiza iha Uma Mahon SLXG, Bidau Largo Lecidere, Dili.

Semináriu loron sorin ne’e aprezente tema “Importánsia Lian Jestuál iha Komunikasaun Inkluzivu” ne’ebé aprezenta hosi Diretora Ezekutiva Klibur Difisiénsia Tilun Timor-Leste (KDTTL), Crecencia Madeira de Deus, no Diretór Nasionál Tránzitu Seguransa no Rodoviáriu (DNTSRV), Superintendente João Belo, aprezenta tema “Importánsia Sinais Tránzitu Ba Motorista”.

Diretora Ezekutiva Klibur Defisiénsia Tilun Timor-Leste (KDTTL), Crecencia Madeira de Deus, hateten daudaun ne’e KDTTL iha ona tradutór ba lian jestuál hamutuk na’in-13, tanba ne’e KDTTL prontu servisu hamutuk ho Governu no mídia elektronika sira hanesan mídia estatál RTTL, mídia privadu GMNTV, STLTV, no GardamorTV Online atu promove lian jestuál para ema ho defisiénsia sira bele asesu informasaun liuhosi komunikasaun inkluzivu.

“Agora daudauk ami iha tradutór hamutuk na’in-13 maibé sira na’in-10 sei halo hela pratika. Se Governu no mídia elektronika sira hanesan mídia estatál RTTL no mídia privadu sira hanesan GMNTV, STLTV, no GardamorTV Online hakarak servisu hamutuk ho ami karik, bele hakbesik aan mai ami-nia edifisiu, ita bele halo komunikasaun ba malu atu hakat ba futuru, ita servisu hamutuk hodi promove lian jestuál ne’e. Ami, KDTTL hein hela ita-boot sira-nia partisipasaun ba iha ami-nia fatin atu tuir lian jestuál,” dehan Crecencia Madeira de Deus bainhira aprezenta tema “Importánsia Lian Jestuál iha Komunikasaun Inkluzivu” iha semináriu loron sorin ne’ebé hala’o iha Uma Mahon Sala Leitura Xanana Gusmão (SLXG), Bidau Largo Lecidere, Dili, kuarta ne’e.

Nia hatutan, atu bele servisu hamutuk ho Tradutór Lian Jestuál Timor-Leste (TLJTL) iha KDTTL ne’e iha tradutór lian jestuál na’in-tolu (3) ne’ebé hetan apoiu hosi Sekretáriu Estadu Komunikasaun Sosiál (SEKOMS) ne’ebé aumenta tan formandu tradutór na’in-10 kona-ba lian jestuál.

Tanba ne’e, nia hateten, KDTTL hato’o agradese ba treinadór lian jestuál (Oeny) ne’ebé mak ajuda ona komunidade defisiente tilun sira, tanba uluk defisiente tilun sira seidauk hatene lian jestuál hodi eduka ema ho defisiente tilun sira bele halo komunikasaun ba malu liuhosi lian jestuál.

Entretantu, Diretór Nasionál Tránzitu Seguransa no Rodoviáriu, Superintendente João Belo, informa seguransa rodoviáriu nian iha Timor-Leste tomak, hanesan ema estranjeiru sira bainhira tama mai Timor-Leste no tuun iha aeroportu Nicolau Lobato Dili no sira sa’e karreta tama Dili ne’e, sira hahú hare’e ona Timor-Leste nia lei la’o di’ak ka lae mak juventude sira lori motor la tuir regra.

“Ema estranjeiru sira komesa haree rasik ho sira-nia matan katak joven timoroan sira komesa hatudu ona hahalok ne’ebé mak la di’ak. Hanesan, sa’e motor la uza kapasete no kontra regra tranzitu nian. Ho ida-ne’e ema estranjeiru sira komesa hatene ona katak Timor-Leste nia lei la’o la di’ak,” dehan João Belo bainhira aprezenta tema “Importánsia Sinais Trafiku ba Motorista” iha semináriu loron sorin ne’ebé hala’o iha Salaun SLXG, Bidau Largo Lecidere, Dili.

Aleinde ne’e, nia informa, hahú hosi janeiru to’o setembru ne’e ema mate hamutuk na’in-49, kanek kmaan na’in-1082 no kanek todan na’in-204 tanba kada loron asidente iha munisípiu 13 ne’e sempre akontese hela de’it. 

“Kauza hosi asidente ne’e primeiru ita haree hahalok ema-nian, lakohi kumpre regra sinais tranzitu nian. Ida-ne’e mak sempre akontese hela de’it asidente iha ita-nia rai doben Timor-Leste. Tuir ita-nia lei kodigu estrada númeru 6/2003, iha ne’ebá hateten ema ho kondisaun no psikolojia di’ak mak bele hetan karta kondusaun atu lori karreta ka motor,” nia dehan.

Tanba, nia hateten, buat hirak ne’e hotu halo ema hotu tenke la’o tuir lei. Hanesan sidadaun di’ak ida iha Timor, ema ida-idak tenke kumpre ba lei no lei hateten ema ne’ebé mak atu hetan karta kondusaun ne’e tenke iha saúde ne’ebe mak di’ak hahú hosi ain-kukun to’o fuuk-lahan.

Ba oin, nia dehan, Dirasaun Nasionál Transporte Terrestre (DNTT) sira sei halo teste ba ema ida-idak ho kondisaun ne’ebé mak di’ak tuir lei hakerek ona, tanba lei hateten katak ema ho defisiensia sira labele hetan karta kondusaun.

“Ida-ne’e akontese tanba ita seidauk iha lian jestuál tranzitu nian. Lei ida-ne’e mak sei sai difikuldade mai ita. Karik, ba oin, Governu hanoin atu halo mudansa ba ami polísia, ami prontu kontribui,” nia dehan.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here