Reprezentante ILO, UE no autoridade lokál tau fatuk dahuluk sinál hahú projetu estrada rurál iha suku Caenlio, kuarta (23/09). Imajen Tatoli/Natalino Costa

LAUTÉM, 23 setembru 2020 (TATOLI)International Labour Organization (ILO) liuhosi projetu Enhancing Rural Access Agro-Florestry (ERA-AF) hamutuk ho Uniaun Europeia (UE) halo lansamentu kontratu probatóriu estrada rurál iha munisípiu Lautém no Manatuto (turnu III).

Projetu ne’e hetan apoiu finansiamentu hosi Uniaun Europeia ho montante millaun $12 resin.

Reprezentante Delegasaun UE, Paolo Toselli, hateten UE louva dezenvolvimentu ne’ebé la’o iha Timor-Leste.

“Ami kontente haree dezenvolvimentu iha Timor-Leste, liuliu ba estrada rurál. Tanba ne’e promete sei kontinua apoiu ba atividade sira hanesan ne’e,” tenik Delegasaun UE ne’e iha suku Caenlio, postu administrativu Iliomar, munisípiu Lautém, kuarta ne’e.

Iha fatin hanesan, Ofisiál Responsável Misaun ILO no Jestór projetu ERA-AF, Albert Uriyo, apresia ho UE ne’ebé envolve direita iha projetu ne’e ho apoiu finansiamentu.

Iha diskursu iha seremónia lansamentu programa ne’e, Administradór munisípiu Lautém, Jeferino dos Santos Sequiera, apresia modelu projeitu estrada rurál ne’ebé prepara rasik hosi ILO.

“Ha’u apresia modelu projetu reabilitasaun estrada rurál ne’ebé ILO halo iha estrada rurál hanesan daudaun iha suku Caenlio, postu administrativu Iliomar. Ba ha’u sufisiente ona,” dehan Administradór munisipiu Lautém.

Biban ne’e, nia agradese ba ILO no UE ne’ebé bele tulun komunidade iha área rurál hodi hadi’a estrada, nune’e komunidade bele asesu ba merkadu produtu lokál no iha fatin hanesan produtu bele folin.

Autoridade munisipál ne’e husu parseiru dezenvolvimentu sira atu garantia kualidade obra Estadu hanesan estrada rurál iha munisípiu Lautém no Manatuto, ne’ebé sei halo iha tempu  badak nia-laran.

“Ita hakarak garante kualidade. Tanba ne’e ha’u husu ILO tenke haree ba kualidade nune’e  Estadu, Governu no povu kontinua tau  konfiansa parseiru sira,” nia akresenta.

Xefe suku Caenlio, Julião Soares, apresia projetu reabilitasaun ne’e tanba bele fasilita movimentasaun komunidade.

“Ha’u espera ho lansamentu projetu estrada rurál munisípiu rua ne’e bele benefisia povu iha área rurál, liuliu Iliomar ne’ebé durante ne’ e sei hakerik ba estrada rurál,” nia dehan.

Estrada rurál ne’ebé maka ILO sei reabilita iha munisípiu Lautém maka iha suku Caenlio postu Administrativu Iliomar ho distánsia kilómetru 10,78, ne’ebé toma konta hosi kontratór haat hanesan Ilie Chao unipessoal, Lda, Irmão Unidos Constration Unip.Lda, Fuiloro Unip.Lda, no Om Brother, Lda.

Estrada Caidavalarin no Liufalun, postu Admistrativu Iliomar ho distánsia kilómentru 1,43, implementa hosi Saras unipessoal, Lda.

Nune’e mós, estrada rurál ne’ebé OIT atu halo tan maka Souro no Loturula, ho distánsia  kilómetru 2,3 ne’ebé sei implenta hosi empreza Tchai ba Celeiro Unip.Lda.

Estrada Souro, Nairete no Leuro ho distánsia klómetru 3,5 no implementa hosi Zoro Constration Unip.Lda.

Estrada rurál seluk iha munisípiu Manatuto maka Ainicolau-Robae no Robae-Hatu ana hun, postu administrativo Laclo, ho distánsia kilómetru 3,3, implementa hosi Ryzena, unip. Lda.

Reabilitasaun estrada seluk maka Boarasmanu-Manufahi ho distánsia kilómetru 3,3.

Iha seremónia ne’e reprezentante hosi ILO no UE inklui autoridade lokál simbolikamente tau fatuk dahuluk nu’udar sinál inísiu hahú ezekuta obra.

Partisipa iha seremonia ne’e maka Administradór Lautém, Administradór Iliomar, Representante Administradór Manatutu, Baucau no Viqueque, Diretór Ministériu Obra Públike Lautém no Manatuto, lia-na’in, inklui estudante no abitante Iliomar.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here