Koordenadór Gabinete Apoiu Sosiedade Sivíl, Filipe da Costa. Imajen Tatoli/Egas Cristovão

DILI, 23 setembru 2020 (TATOLI)–Governu liuhosi Gabinete Primeiru-Ministru aloka orsamentu hamutuk rihun 8-resin ba Gabinete Apoiu Sosiedade Civíl (GASC) ba fulan rua (novembru-dezembru) ne’e.

“Ba fulan novembru no dezembru ba tinan ne’e, ita-nia Gabinete Peimeiru-Ministru aloka orsamentu hamutuk $8000-resin ba Gabinete Apoiu Sosiedade Sívil atu ezekuta ba programa sira hosi organizasaun no sosiedade sívil sira-nia proposta ne’ebé mak hatama iha 2019,” dehan Koordendór GASC, Filipe da Costa, ba Agência TATOLI hafoin partisipa audiénsia públika hamutuk ho ekipa Gabinete Primeiru-Ministru ne’ebé halo audiénsia públika ba proposta Orsamentu Jerál Estadu (OJE) 2020 ho komisaun A ho C, iha sala plenária Parlamentu Nasionál, Dili, kuarta ne’e.

Nia hateten, orsamentu $8000-resin ne’e atu responde ba proposta hosi sosiedade sivíl ho tipu haat (4) mak hanesan fundasaun no asosiasaun sira, organizasaun rezidénsia sira (Ojetil, Sagrada-família, Ojelatil), organizasaun relijiozu no grupu sira.

“Ami garante katak, ami bele ezekuta osan walu-resin ne’e ba proposta hosi sosiedade sívil sira mai ho nia programa feitu entaun bainhira sira hatam proposta no implementa kedas depois ami-nia ekipa halo monitorizasaun no halo avaliasaun ba sira nia implementasaun,” nia hateten. 

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here