Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno. Imajen/Egas Cristovão

DILI, 23 setembru 2020 (TATOLI)–Ministra Negósiu Estranjeiru no Kooperasaun (MNEK), Adaljiza Magno, hateten nia parte sei fasilita prosesu lori fila estudante timoroan na’in 72 ne’ebé durante ne’e estuda iha nasaun Israel hodi filamai Timor-Leste, iha tempu badak relasiona ho surtu COVID-19.

“Sira husu pedidu mai ami atu fila, entaun ami akomoda hela. Tuir loloos sira sei bele eskola iha ne’ebá, tanba Israel sei bele akomoda sira, maibé sira hakarak fila ona tanba saudade família ami akomoda para sira fila,” Ministra dehan ba jornalista sira iha Parlamentu Nasionál, kuarta ne’e.

Governu Israel kompromete atu selu kustu eskola nian ba estudante sira ne’ebé hakarak kontinua sira-nia estudu.

“Sira-nia estudu ramata ona, loloos sei bele kontinua tan tanba Governu Israel hakarak selu tan, maibé sira rasik mak hakarak fila ona entaun ami trata dokumentu hotu para sira fila,” Adaljiza tenik.

Estudante timoroan sira ne’e bá estuda iha Israel kona-ba setór teknolojia agriluktura tanba hetan Kooperasaun servisu entre Governu Timor-Leste no Israel.

“Estudante sira ne’e bá tinan kotuk. Tinan-tinan ita haruka estudante sira bá. Tinan sira liubá ne’e ita haruka 30, sa’e ba 50, agora sa’e ona ba 70 tanba haree ba ita timoroan iha vontade aprende no servisu di’ak sira aumenta kuota,” ministra esplika.

Jornalista: Hortencio Sanchez

Editór   : Agapito dos Santos

HAKEREK NO HATÁN

Please enter your comment!
Please enter your name here